А Лигасының он алтыншы туры аяқталды. Флагмандық турнирдің қорытындысын шығарамыз.
«Қайрат» ҚФФ Академиясын матч соңында тізе бүктірді
Маусым барысында әлі бірде-бір ұпай жоғалтпаған жалғыз команда өз мәртебесін сақтап қалды – алайда «сары-қараларға» бұл жолы біраз тер төгуге тура келді.
ҚФФ Академиясы қорғаныста сәтті ойнап, 88-минутқа дейін шыдады. Тек сол кезде алаңға қосалқы құрамнан шыққан Ислам Рақым есеп ашты, ал компенсаторлық уақытта Роман Черноморец екінші голды соқты – 2:0.
«Қайрат» үшін бұл 16 матчтағы 16-жеңіс: мүмкін болған 48 ұпайдың 48-і, 67 гол және небәрі 5 жіберілген доп. Сонымен қатар алматылықтар екінші матч қатарынан небәрі екі доп айырмасымен жеңіске жетіп отыр. Айта кетейік, «сары-қаралар» бұл кездесуді үздік сұрмергені Дәулет Орынбасарсыз өткізді.
ҚФФ Академиясы бұл ойында төрт ескерту алды. Асхат Дутпаев үшін сары қағаз маусымдағы төртіншісі болды – жартылай қорғаушы келесі матчты өткізіп алады.
«Шахтер» тағы да ұпай жоғалтты
Турнирдің екінші командасы Қостанайда ұпай жоғалтты – «Тобыл» мен «Шахтер» 1:1 есебімен тең түсті.
39-минутта «кеншілердің» қорғаушысы Кирилл Сатжанов есеп ашты, алайда екінші таймда алаң иелері жауап қайтарды: 66-минутта Назар Захарченко гол соқты.
Қарағандылықтар үшін бұл маусымдағы бесінші тең ойын. Алты тур қалғанда олардың «Қайраттан» қалып қоюы 13 ұпайды құрайды.
Қостанайлықтар турнирдегі ең аз гол соққан команда болып қала береді – небәрі 15 доп. Есесіне олар тек 17 гол жіберген – бұл «Қайраттан» (5) және «Шахтерден» (9) кейінгі үшінші көрсеткіш.
«Жас Қыран» 0:2 есебінен камбэк жасады
Турдың ең драмалық матчы Алматыда өтті. Үзіліске дейін «Ордабасы» Дилшод Назимбековтың дублінің арқасында 2:0 есебімен алда тұрды. Шымкенттік команда үшін ешқандай мәселе туындайтындай көрінбеген.
Бәрі 70-минутта өзгерді. Қонақтардың қорғаушысы Асадбек Абдулхакимов айып алаңындағы тәртіп бұзушылығы үшін екінші сары қағазын алып, алаңнан қуылды.
Осы сәттен бастап Алан Луканин жарқырады: алдымен пенальтиді дәл орындады, ал 78-минутта есепті теңестірді.
Одан кейін алаң иелері гол жаудырды: Артур Глушков 83-минутта «Жас Қыранды» алға шығарды, Сергей Шарунов 90-минутта 11 метрлік айып добын мүлт жібермеді, ал компенсаторлық уақытта Луканин хет-трик жасады. Қосалқы құрамнан шыққан Әділбек Турдахтың добы «Ордабасы» үшін тек жұбаныш голы болды – 5:3.
Осы жеңістің арқасында алматылықтар үшінші орында тұрған «Ордабасыдан» қалып қоюын бес ұпайға дейін қысқартты.
«Қайсар» жеңілістер сериясын тоқтатты
Қызылордада «қасқырлар» «Каспийді» 4:1 есебімен жеңіп, қатарынан төрт жеңілістен тұратын сериясын тоқтатты.
Қонақтар 8-минутта Рамазан Амангельдиевтің голымен есепті бірінші болып ашты, алайда кейін бастама толықтай алаң иелеріне өтті: Ернұр Сейтбеков пен Нұрым Талғат бір-бір голдан соқты, ал Ернар Парда дубль жасады.
Дегенмен бұл жеңістің жағымсыз тұсы да бар. Парда мен команда капитаны Нұрым Талғат матчта маусымдағы төртінші сары қағаздарын алды, сондықтан екеуі де келесі ойынды өткізіп алады.
«Тараз» соңғы минутта құтылды
Ақтөбедегі матч 2:2 есебімен аяқталды. Бір қызығы, төрт голдың барлығы үзілістен кейін соғылды.
51-минутта Аян Аманжұлов есеп ашты, ал 81-минутта Ремзи Али-Оглы таразы басын теңестірді. Көп ұзамай Ашер Асхат Аманжұловтың пасынан кейін «Ақтөбені» қайта алға шығарды, бірақ матч соңында Билял Садықов қорытынды есепті белгіледі.
Қызығы, оңтүстік командасының екі голын да 72-минутта алаңға шыққан футболшылар соқты.
Ұпай жоғалту «қызыл-ақтарға» тығыз орналасқан бәсекелестер тобынан ұзап кетуге мүмкіндік бермеді: «Ақтөбе» бесінші орында тұрғанымен, сегізінші сатыдағы «Тараздан» команданы небәрі бір ұпай бөліп тұр.
«Ертістің» қонақтағы жеңісі
Павлодарлықтар елордадан үш ұпай алып қайтты – «Астананы» 3:2 есебімен жеңді. Үзіліске дейін қонақтар 3:1 есебімен алда тұрды: Мадияр Есен дубль жасаса, тағы бір голды Алдияр Смағұлов соқты.
Алаң иелері сапынан Амандық Хамидуллин және оның пасынан гол соққан Мансұр Алихан мергендік танытты, бірақ елордалық команда есепті теңестіре алмады. «Астананың» тәртібін де бөлек атап өтуге болады – бір матчта бес ескерту.
«Ертіс» әлі де турнир кестесінің соңғы орнында тұр, алайда «Каспийден» қалып қоюын бір ұпайға дейін қысқартты.
16-турдан кейінгі үздік сұрмерген: Дәулет Орынбасар («Қайрат», 17 гол).
16-турдан кейінгі үздік ассистент: Аян Аманжұлов («Ақтөбе», 8 нәтижелі пас).
~2.JPG)
