Қыздар турнирінің кезекті турына шолу.
«Тобыл» – «Қайрат»
Турдың орталық матчы: чемпионат көшбасшысы қола жүлде үшін күресіп жатқан үш команданың бірімен ойнау үшін Қостанайға аттанады.
«Қайрат» турнир кестесінің бірінші орнына тек өткен турда көтерілді – «Астананы» ірі есеппен жеңу (5:0) қазіргі чемпиондарға елордалық команданы басып озып, екі ұпайлық басымдыққа ие болуға мүмкіндік берді.
«Сары-қаралардың» көрсеткіштері әсерлі: он турда 60 гол соғып, небәрі жеті доп жіберген. «Қайрат» маусымдағы жалғыз жеңілісін 3-турда – дәл осы «Астанадан» қабылдағанын еске салайық.
Ал «Тобыл» матчқа жақсы қарқынмен келеді – команда қатарынан екі ірі жеңіске жетті. «Қайратпен» алғашқы кездесу ірі жеңіліспен аяқталғанымен, өз алаңында қостанайлықтар сырттағы матчтарға қарағанда сенімдірек ойнайды: бес ойында үш жеңіс және 12 гол. Бұл фаворитке қиындық туғызуға жеткілікті бола ма?
«Ақтөбе» – «Ордабасы»
«Ақтөбе» қазір үшінші орында, бірақ мұндағы бәсеке өте тығыз: «қызыл-ақтар», «Тобыл» және «Шахтер» 14 ұпайдан жинаған, командаларды тек қосымша көрсеткіштер бөліп тұр.
Команда бұл турға өткен ойын аптасындағы ең ірі жеңістен кейін келеді – Қызылордада 8:0. Осылайша «Ақтөбе» қатарынан екі жеңілістен тұратын сериясын тоқтатты.
«Ордабасы» алтыншы орында және жүлдеге таласып жатқан басқа командалардан төрт ұпайға қалып келеді. Шымкенттіктер – тең ойындар саны бойынша турнир рекордшылары (төрт) әрі «Қайраттан» бөлек «Астанадан» ұпай алған жалғыз команда (елордада 2:2). Өткен турда оңтүстік команда Қарағандыда 2:4 есебімен жеңілді.
Қонақтар қола жүлде үшін күреске қайта орала ала ма?
«Ертіс» – «Шахтер»
«Қайраттан» ірі есеппен жеңілу (0:11) «Шахтердің» доп айырмасына елеулі әсер етті (-6). Сондықтан қарағандылық команда Павлодарда жай ғана жеңуге емес, ірі есеппен басым түсуге де мүдделі болады. Бірінші айналымдағы кездесу «Ертістің» 0:2 есебімен жеңілуімен аяқталғанын еске салайық.
«Ертіс» жеті ұпаймен соңғыдан бір саты жоғары тұр және әлі де мүмкіндіктерін голға айналдыруда қиындық көріп келеді – он ойында небәрі 10 гол (тек «Қайсарда» аз). Алайда 8-турда «Ақтөбені» жеңуі павлодарлық команданың жүлде үшін күрестің барысына айтарлықтай ықпал ете алатынын көрсетті.
«Астана» – «Қайсар»
Алматыдағы жеңілістен кейін «Астана» «Қайраттан» екі ұпайға қалып келеді, ал чемпионаттың аяқталуына төрт тур қалды. Сондықтан елордалық футболшылардың тағы бір рет ұпай жоғалтуға құқығы жоқ.
«Астана» өз алаңында әлі жеңілген жоқ: төрт жеңіс, бір тең ойын және 16:5 доп айырмасы. Шабуылда команданы Асыл Пазыл (6+1), Софья Рыбак (5+1) және Жібек Мараттан (5+8, ассист саны бойынша турнирдегі екінші көрсеткіш) құралған үштік алға сүйреп жүр.
«Қайсар» болса аутсайдер күйінде қалып отыр: үш ұпай, 6:47 доп айырмасы және қатарынан сегіз жеңіліс. Қызылордалықтар жалғыз жеңісін 2-турда өз алаңында «Ордабасыға» қарсы (3:2) алған. Сенсация бола ма?
~2.JPG)
