«Шахтердің» сүрінуі, «Кайраттың» қиын жеңісі: Freedom QJ League-тің 4-туры қалай өтті

«Шахтер» ұпай жоғалтты

Чемпионат көшбасшыларының бірі – қарағандылық «Шахтер» – жеңісті сериясын тоқтатып, сырт алаңда «Ақтөбемен» тең ойнады (1:1).

Қос гол да бір аралықта соғылды: алдымен 63-минутта «кеншілердің» қорғаушысы Жәнібек Жайлаубек есеп ашса, 66-минутта Роман Шаповалов таразы басын теңестірді.

Бір қызығы, бұл U-18 турнирінің қазіргі маусымындағы алғашқы тең нәтиже болды – бұған дейін барлық матчта міндетті түрде бір команда жеңіске жетіп келген.

Айта кетейік, «кеншілер» флагмандық турнирдегі ең сенімді қорғаныс шептерінің біріне ие болып отыр. Төрт турдан кейін небәрі екі гол жіберген – бұл көрсеткіш бойынша олардан тек «Кайрат» қана сәттірек.

«Кайраттың» минималды жеңісі

«Сары-қаралар» Қостанайда «Тобылға» қарсы матчта жеңісті сериясын жалғастырды – бірақ бұл оңай болған жоқ. Командалар ұзақ уақыт бойы бір-бірінің қақпасына жол таба алмады, ойын таблодағы қос нөлмен аяқталатындай көрінген. Алайда 85-минутта Абылай Жілқайдар алаң иелерінің қақпасын дәл көздеді. Матч 1:0 есебімен аяқталды.

Осылайша «Кайрат» флагмандық турнирде әлі бірде-бір гол жібермеген жалғыз команда болып қалды. Сонымен қатар алматылықтар төрт турда қарсыластарының қақпасына 23 гол соқты.

«Жас Қыран» «Ертісті» ойсырата ұтты

Турнирдің екінші алматылық көшбасшысы Павлодардан келген қонақтарды ірі есеппен жеңді. Матч 4:1 есебімен аяқталды. Алаң иелері сапында Тимур Ипполитов пен Нұрбол Нұрлан бір-бір голдан соқса, Сергей Шарунов дубль авторы атанды. «Ертіс» тарапынан тек Тимур Титаренко ғана голмен көзге түсті.

Осылайша төрт турдан кейін тек «Жас Қыран» мен «Кайраттың» еншісінде мүмкін болған 12 ұпайдың 12-сі бар.

Академия КФФ-ның сенімді жеңісі

«Ертіс» секілді «Қаспий» де төртінші турда ұпай жинай алмады. Ақтаулық команда үшін сырт алаңдағы ойын маусымдағы алғашқы ірі жеңіліске айналды – Академия КФФ-дан 0:4. Алаң иелері сапында Сұлтан Дәуренов, Никита Лисохмар, Радмир Хизметов және Мансур Болат гол соқты.

Бәлкім, «Қаспий» екінші таймның басында ойын барысын өзгерте алар еді – қонақтар 11 метрлік айып добын орындау құқығына ие болды. Алайда Шахмардан Демесиннің соққысын қақпашы қайтарды.

Бірінші таймдағы төрт гол

Елордада «Астана» «Таразды» жеңді. Матчтың қорытынды есебі үзіліске дейін-ақ қалыптасты: алдымен алаң иелерінің хавбегі Қуандық Хамидуллин пенальтиді сәтті орындап, есеп ашты, ал 29-минутта Расул Нұрманбай 11 метрлік нүктеден есепті теңестірді.

Жеңімпазды анықтаған қалған екі гол ойыннан соғылды – 36 және 39-минуттарда. Олардың авторлары Арсен Испанов пен Мейіржан Серік болды.

Айта кетейік, «Тараз» қақпаға «Астанадан» екі есе жиі соққы жасады – 24 мүмкіндікке қарсы 12. Алайда қақпаға дәл бағытталған соққылар саны шамалас болды: елордалық командада – 6, оңтүстіктіктерде – 5.

Турдах пен Рахимжанов «Ордабасыға» жеңіс сыйлады

Қызылордадағы «Қайсар» мен «Ордабасы» арасындағы матч шымкенттік команданың сенімді жеңісімен аяқталды – 4:1.

Қонақтар бірінші таймда-ақ екі гол соқты – әрі екі жағдайда да Дияр Рахимжановтың пасынан кейін Адилбек Турдах көзге түсті. Осы екі голдың арасында «Ордабасы» бір ойыншыға кем қалды – қорғаушы Мұхит Абдулахмед алаңнан қуылды.

Соған қарамастан «Ордабасы» ойынды бақылауда ұстай алды. 57-минутта Жандос Досхал есепті ірі етті. 88-минутта «Қайсардың» жартылай қорғаушысы Сұлтанәлі Өміртай есеп айырмасын қысқартқанымен, соңғы сөз қонақтарда қалды. «Ордабасының» төртінші голын Шыңғыс Қожахметов соқты.

4-турдан кейінгі үздік сұрмергендер: Дәулет Орынбасар («Кайрат») және Сергей Шарунов («Жас Қыран») – 5 голдан.

4-турдан кейінгі үздік ассистенттер: Дияр Рахимжанов («Ордабасы»), Алан Луканин («Жас Қыран»), Төре Исмағұлов және Абылай Төлеухан («Кайрат») – 3 нәтижелі пастан.