QJL All Star 2026 құрамасының қарсыласы – Менхенгладбахтың «Боруссиясы»!

Лиганың үздік жас футболшыларынан жасақталған QJL All Star құрамасына қарсы Менхенгладбахтың «Боруссия» академиясының командасы алаңға шығады.

Менхенгладбахтық «Боруссияның» академиясы – Германиядағы ең беделді әрі танымал футбол мектептерінің бірі. Бұл жүйе еуропалық футболға Юпп Хайнкес, Хорст-Дитер Хёттгес және Марк-Андре тер Стеген секілді әр буынның кумирлерін сыйлады.

Сонымен қатар «қара-ақ-жасылдар» тек өткен жетістіктерімен шектеліп отырған жоқ. Академия деңгейінің айқын дәлелі – былтыр 2008-2009 жылы туған футболшылардан құралған U-17 командасының Германия чемпионатында жеңіске жетуі. Басқа жас санаттарындағы командалар да жоғары нәтижелер көрсетіп келеді, ал академия түлектері жастар және негізгі құрамаларда мүмкіндік алуда.

Әдеттегідей, QJL All Star – бұл жай ғана жолдастық матч емес. Бұл – қала тұрғындарына арналған үлкен футбол мерекесі, ойыншылар үшін ұмытылмас тәжірибе әрі ерекше сынақ.

Ойын Алматы қаласында өтеді. Қосымша ақпарат кейінірек жарияланады. Жаңалықтарды бақылап отырыңыздар!