Тосын нәтижелер күтеміз: флагмандық турнирдің 4-турының превьюі

«Астана» – «Тараз»

Екі команданың да еншісінде үш ұпайдан бар. Айта кетерлігі, «Астана» да, «Тараз» да қазіргі турнир кестесінің көшбасшыларына екі реттен есе жіберді.

Өткен турда оңтүстік ұжымы маусымдағы алғашқы жеңісіне қол жеткізіп, «Ертісті» сенімді түрде ұтты. Ал елордалық футболшылардың әзірге жалғыз табысы алғашқы ойын уикендінде тіркелді – «Астана» Ақтаудан қиын ұпай алып қайтты, әрі матч нәтижесіне автогол мен пенальти маңызды әсер етті. Алаң иелері әлі күнге дейін ойыннан гол соққан жоқ. Бұл жолы жағдай өзгере ме?

«Ақтөбе» – «Шахтер»

«Кеншілер» Ақтөбеге турнир кестесіндегі үш жеңілмеген көшбасшының бірі мәртебесінде келеді.

Алайда «Қайрат» пен «Жас Қыраннан» айырмашылығы, қарағандылық команда әзірге көп гол соғуымен мақтана алмайды – үш турдан кейін небәрі алты доп. Есесіне «Шахтер» өз қақпасына тек бір гол жіберді – бұл көрсеткіш бойынша тек «Қайраттың» нәтижесі жақсырақ.

Алаң иелеріне келсек, «қызыл-ақтар» жалғыз үй матчында жеңіске жетіп, екі жеңілісін де сырт алаңда қабылдады. Өткен уикенд «Ақтөбе» үшін «Қайраттан» ірі жеңіліспен аяқталды. Сондықтан алаң иелері жанкүйерлер алдында ақталуға ерекше ынталы болары анық.

«Қайсар» – «Ордабасы»

Бірінші турда мерекелік «Қайсар Аренада» «Тобылды» жеңгеннен кейін қызылордалықтар Академия ҚФФ-мен матчтың кейінге шегерілуіне байланысты келесі уикендті өткізіп алды. Ал өткен демалыста «қасқырлар» «Жас Қыраннан» ірі есеппен ұтылды.

Шымкенттіктердің де жағдайы мәз емес. Адият Отарбектің дублінің арқасында «Ақтөбені» минималды есеппен жеңгеннен кейін екі жеңіліс тіркелді: «Тобылдан» және Академия ҚФФ-дан.

Төртінші турда жеңіске жеткен команда сәтті траекторияға шығу үшін жақсы психологиялық серпін алады. Бірақ ол қай команда болмақ?

«Жас Қыран» – «Ертіс»

Маусымды үш жеңіспен сенімді бастаған алматылықтар қазіргі уақытта турнир кестесінің соңында тұрған командамен кездеседі.

Қазір «Жас Қыранның» үздік сұрмергені – үш турда төрт гол соққан Алан Луканин. Бұған қоса, оның еншісінде екі нәтижелі пас бар. Сондай-ақ Сергей Шарунов әр ойында нәтижелі әрекетімен көзге түсіп келеді – «гол+пас» жүйесі бойынша 3+2. Бұл байланыс төртінші турда да нәтижелі бола ала ма? Әлде «Ертіс» тосын сый жасай ма?

ҚФФ академиясы – «Каспий»

ҚФФ академиясы турнир кестесінде бесінші орында тұрғанымен және «Қайсармен» бір ойыны қорда болғанымен, ал «Каспий» үш матчтың бәрінде жеңілгенімен, бұл кездесудің нәтижесі бәрібір болжап болмайтындай көрінеді.

Мәселе мынада: ақтаулықтарда минималды есеппен үш рет қатарынан жеңілу деген ерекше серия бар – 1:2. Демек, «Каспийдің» сәтсіздіктері маңғыстаулықтармен матчтар қарсыластар үшін жеңіл серуен болды дегенді білдірмейді.

Академия ҚФФ-ның Шымкентте «Ордабасыны» ерекше жағдайда жеңгенін де ұмытпау керек. Қонақтар 4:3 есебімен жеңіске жеткенімен, ойыннан бірде-бір гол соққан жоқ – табысқа қарсыластың екі автоголы мен екі пенальтидің арқасында жетті. Сондықтан алдағы кездесуде кез келген сценарий болуы мүмкін.

«Тобыл» – «Қайрат»

Маусым басында өз қақпасына бірде-бір гол жібермеген чемпионат көшбасшылары оңай емес қарсыласпен кездеседі. «Қайсардан» минималды есеппен жеңілгеннен кейін қостанайлық команда қатарынан екі жеңіске жетті.

Сонымен қатар Олег Лотовтың шәкірттері үш турда небәрі екі гол жіберді. Бұған команданың бұрын он жыл бойы шабуылшы позициясында ойнаған қақпашысы – 16 жастағы Даниил Нуржанов маңызды үлес қосты.

Дегенмен алматылықтардың құрамында Роман Черноморец пен Абылай Төлеухан секілді нәтижелі ойыншылар жеткілікті екенін ұмытпау керек. Бірақ ерекше назар бомбардирлер көшін бастап тұрған Дәулет Орынбасарға ауады – ол әзірге әр турда гол соғып, үш кездесуде бес допты өз есебіне жазып үлгерді.