Флагмандық турнирдегі кезекті ойын уикендінің қорытындысын шығарамыз.
«Қайрат» «Ақтөбеге» мүмкіндік қалдырмады
Қазіргі чемпиондар Ақтөбеде үш ұпайды сенімді түрде еншіледі – 4:0.
Есепті 10-минутта Дәулет Орынбасар ашса, 22-минутта Сұлтанәлі Әбдуәлі басымдықты еселеді. Үзілістен кейін Орынбасар хет-трик авторы атанды: алдымен 58-минутта ойыннан гол соқты, кейін 71-минутта пенальтиді дәл орындады.
Сұрмергендер жарысының көшбасшысы үшін бұл маусымдағы 17-гол болды – шабуылшы 14 матчта «гол+пас» жүйесі бойынша 21 ұпай жинады. Ең жақын қуғыншысы, «Шахтердің» жартылай қорғаушысы Расул Акимов енді төрт голға қалып келеді – ол бұл турға қатысқан жоқ.
«Қайрат» флагмандық турнирде әлі бірде-бір ұпай жоғалтпаған жалғыз команда болып отыр: 14 матчта 14 жеңіс, 42 ұпай, 63 гол және небәрі 5 жіберілген доп. «Ақтөбе» бұл жеңілістен кейін 19 ұпаймен алтыншы орында келеді.
«Кеншілер» ұпай жоғалтты
Air Arena-да «Астана» «Шахтерді» қабылдап, қарағандылықтардың «Қайратты» қуып жету мүмкіндігін айтарлықтай азайтты. Матч 0:0 есебімен аяқталды.
Ойын өте тартысты өтті: төреші сегіз сары қағаз көрсетті. Оның екеуін Даниял Назаров алды – 87-минутта «Шахтердің» жартылай қорғаушысы командасын азшылықта қалдырды.
Осылайша, биылғы маусымда 34 гол жіберген елордалық клуб лигадағы нәтижелілігі бойынша екінші орында тұрған шабуылды тоқтата алды – бұған Расул Акимовтың алаңға шықпауы да әсер етті.
«Шахтер» соңғы үш турда екінші рет тең түсті – қарағандылықтар 31 ұпаймен екінші орынды нық ұстап тұр, алайда «Қайраттан» артта қалуы 11 ұпайға дейін өсті. Чемпионаттың аяқталуына сегіз тур қалды.
КФФ академиясы «Ордабасыны» тоқтатты
Уикендтің басты сенсациясы Талғарда тіркелді. Флагмандық турнирдің ең жас командасы үшінші орында келе жатқан шымкенттіктерді 2:0 есебімен жеңді.
Екі гол да бірінші таймда соғылды. 5-минутта Радмир Хизметов пенальтиді дәл орындаса, 31-минутта Мансур Болат матчтың соңғы есебін белгіледі. «Ордабасы» жауап қайтара алмады.
КФФ академиясы қатарынан үшінші жеңісіне жетті – Юрий Мархель шәкірттері бесінші орынға көтеріліп, «Жас Қыранмен» ұпай санын теңестірді (екеуінде де 20 ұпайдан). Ал «Ордабасының» бес матчқа созылған жеңісті сериясы аяқталды, алайда шымкенттіктер 26 ұпаймен үшінші орында қалды.
«Жас Қыран» жеңілістер сериясын тоқтатты
Олег Трофимов шәкірттері «Қайсарға» қарсы үйдегі матчтың тағдырын алғашқы бес минутта-ақ шешіп қойды: алдымен Алан Луканин гол соқты, кейін Сергей Шарунов екінші допты енгізді. Бір қызығы, екеуі де бір-біріне нәтижелі пас берді.
«Қасқырлар» 27-минутта бір голдың қарымтасын қайтарды – Ернар Парда мергендік танытты. Бірақ одан артыққа шамалары жетпеді – матчтың нүктесін алаңға қосалқы құрамнан шыққан Нұрбол Нұрлан қойып, 89-минутта гол соқты. Қорытынды есеп – 3:1.
Бұл жеңіс «Жас Қыранның» қатарынан үш матчқа созылған жеңілістер сериясын тоқтатты. Алматы командасы төртінші орында, ал 12 ұпайы бар «Қайсар» оныншы сатыда келеді.
«Каспийдің» алғашқы тең ойыны
«Тобыл» мен «Каспий» Қостанайда жеңімпазды анықтай алмады – 1:1.
8-минутта есепті қонақтар ашты: маусымдағы небәрі екінші матчын өткізген «джокер» Әбілқайыр Жармұхамет гол соқты. Алаң иелері үзілістен кейін таразы басын теңестірді – 65-минутта қорғаушы Ерулан Шүкір мергендік танытты. Бұдан кейін гол болған жоқ.
Бұл нәтиже қонақтар үшін ерекше: 14-турға дейін ақтаулықтар бірде-бір рет тең түспеген еді – үш жеңіс және он жеңіліс. Енді Руслан Бесенғалиев командасында 10 ұпай бар, алайда олар әлі де соңғының алдындағы орында тұр.
«Тобыл» нөлдік доп айырмасымен жетінші орында келеді – 14:14. Қостанайлықтар лигада «Қайрат» пен «Шахтерден» кейін ең аз гол жіберген команда, ал қақпашы Даниил Нұржанов соққылардың 80%-ын қайтарып, тұрақты түрде негізгі құрамда ойнайтын қақпашылар арасында сейв пайызы бойынша үздік көрсеткішке ие.
«Тараз» Павлодардан үш ұпай алып кетті
«Ертіс» пен «Тараз» арасындағы матчтағы жалғыз гол 11 метрлік белгіден соғылды: 69-минутта Расул Нұрманбай пенальтиді дәл орындады – қонақтардың пайдасына 1:0.
Оңтүстік командасының жартылай қорғаушысы үшін бұл маусымдағы сегізінші гол – оның төртеуі пенальтиден соғылды.
Матчтың соңы «Ертіс» үшін сәтсіз болды – 89-минутта қорғаушы Тимур Титаренко екінші сары қағазын алып, павлодарлықтар соңғы минуттарды он ойыншымен өткізді.
«Тараз» қатарынан екінші жеңісіне жетіп, 15 ұпаймен тоғызыншы орында келеді. Ал «Ертіс» турнир кестесін түйіндеп тұр: 8 ұпай және 43 жіберілген гол – қазіргі таңда турнирдегі ең нашар көрсеткіш.
14-турдан кейінгі үздік сұрмерген: Дәулет Орынбасар («Қайрат», 17 гол).
14-турдан кейінгі үздік ассистент: Аян Аманжұлов («Ақтөбе», 7 нәтижелі пас).
