Freedom QJ League-тің 14-туры аяқталды. А лигасының кіші жас санаттарындағы матчтардың басты оқиғаларына тоқталамыз.
Freedom QJ League U-17
«Шахтердің» күтпеген сүрінуі
U-17 жарысындағы турдың басты жаңалығы – «Шахтердің» Астанада жеңілуі. Елордалық команда үзіліске дейін үш гол соқты – Даниэль Цой, Амир Асатов және Арнұр Қуандықұлы бір-бір реттен мергендік танытты. Алтайыр Құрманбеков бірден екі нәтижелі пас берді.
«Кеншілер» тек Тимур Казанцевтің пенальтиден соққан голымен жауап қайтара алды. Осылайша «Қайратқа» чемпиондық бәсекеде үш ұпайға ұзап кетуге мүмкіндік туды. Дегенмен алматылықтар бұл мүмкіндікті әзірге пайдалана қойған жоқ – «Ақтөбеге» қарсы матч 12 тамызда өтеді.
«Ордабасы» позициясын нығайтты
Пеле атындағы стадионда өткен КФФ академиясы мен «Ордабасы» арасындағы матч тартысты болды. 13-минутта алаң иелерінің жартылай қорғаушысы Абзал Әділхан есеп ашты. Көп ұзамай Темур Султаниясов таразы басын теңестірді, алайда арада бірнеше минут өткенде КФФ академиясы қайта алға шықты – Динур Қабыл пенальтиді сәтті орындады.
Бірінші тайм сәтсіздеу өткеніне қарамастан, үзілістен кейін «Ордабасы» жеңісті жұлып алды. 65-минутта Алихан Адил есепті теңестірсе, кездесудің соңында Султаниясовтың пасынан кейін Мухаммад Эгамбердиев қорытынды есепті белгіледі – 3:2, қонақтардың пайдасына.
«Ордабасы» турнир кестесінде әлі де үшінші орында, бірақ «Шахтерден» артта қалу алты ұпайға дейін қысқарды.
«Ертіс» сәтсіз сериясын тоқтатты
Павлодардағы матч алаң иелері үшін сәтті аяқталды – Алексей Сорокин шәкірттері маусым айының соңынан бері алғаш рет жеңіске жетіп, соңғы бес турдағы алғашқы ұпайларын алды.
Алғашқы таймда-ақ жақсы басымдық жасалды – Даниял Искаков пен Саин Кажмухан гол соқты. Алайда үзілістен кейін «Тараз» есепті теңестірді. Шыңғыс Қайрат алдымен Арслан Жылысбекке нәтижелі пас беріп, кейін өзі де гол соқты.
Дегенмен 81-минутта алаң иелері пенальти орындау құқығына ие болды. Саин Кажмухан мүмкіндігін мүлт жібермей, дубль авторы атанды.
Freedom QJ League U-16
«Ақтөбе» тағы да сенсация жасады!
«Қайрат» U-16 ойыншылары бірінші айналымда өздерінен ұпай алған жалғыз команда – «Ақтөбені» жеңуге ерекше ынталы болғаны анық. Алайда «қызыл-ақтар» жанкүйерлерін тағы да тең нәтижемен қуантты – бұл жолы Алматыда.
Алдыңғы кездесу 1:1 есебімен аяқталса, бұл жолы алматылықтар 80 минут ішінде қонақтардың қорғанысын бұза алмады.
«Қайраттың» бұл сүрінуін «Астананы» 6:1 есебімен ойсырата жеңген «Шахтер» пайдаланды. Дегенмен көшбасшының басымдығы әлі де айтарлықтай – екінші орында келе жатқан «кеншілер» «Қайраттан» бес ұпайға қалып тұр. Ал «Ақтөбенің» еншісінде қазір 22 ұпай бар және команда бесінші орында.
Жүлделер үшін күрес қызу жүріп жатыр
U-16 турнирінде командалар арасындағы ұпай айырмасы аз, ал өткен матчтар интриганы одан әрі күшейтті. Мәселен, ірі есеппен жеңілген «Астана» қазір 18 ұпаймен тоғызыншы орында тұр. Алайда қола жүлде аймағындағы «Атлетикодан» (25) небәрі жеті ұпайға қалып келеді.
Жүлдеге үміткерлер қатарында «Ордабасы» (24), «Ақтөбе» (22), «Тобыл» (21), «Ертіс» (20) және «Жас Қыран» (19) да бар. Алдағы турлар өте тартысты болмақ.
Freedom QJ League U-15
Ақтауда он гол
«Каспий» мен «Тобылдың» кіші командалары арасындағы матч аса нәтижелі өтті – 3:7.
Есепті алаң иелері ашқанына қарамастан, Қостанай командасының нәтижелі шабуылдары әлдеқайда көп болды. Матчтың ең нәтижелі ойыншысы Руслан Плясковский атанды – оның еншісінде дубль және бір нәтижелі пас бар. Алижан Амиртаев та екі гол соқты. Нұржалғас Сейлбек, Исмеджан Бермухамбет және Ильдар Жармагамбетов бір-бір реттен мергендік танытты.
Еске салайық, U-15 санатындағы «Ордабасы» – «Атлетико» матчы 26 тамызда өтеді.
14-турдан кейінгі үздік сұрмергендер
Freedom QJ League U-17: Темірлан Абжапар («Қайрат») және Тимур Тугамбеков («Жас Қыран», 10 голдан);
Freedom QJ League U-16: Балахмет Адилбек («Тобыл», 13 гол);
Freedom QJ League U-15: Абылай Тұрсын («Қайрат», 21 гол).
14-турдан кейінгі үздік ассистенттер
Freedom QJ League U-17: Темірлан Абжапар («Қайрат», 9 нәтижелі пас);
Freedom QJ League U-16: Алихан Карим («Шахтер», 9 нәтижелі пас);
Freedom QJ League U-15: Абдурахим Онгарбек («Қайрат», 11 нәтижелі пас).
