Қайта кездесуге үміт: Freedom QJ League W 8-туры алдында нені білу керек

«Шахтер» – «Ертіс»

Маусымның ашылу матчы қайта оралады – тек бұл жолы «Ертіс» қонақ ретінде алаңға шығады.

Еске салайық, Павлодарда «Золушкалар» 1:5 есебімен жеңілген еді. Осыдан кейін Сергей Поленовтің командасы сәтті кезең өткізді, бірақ соңғы үш ойында жеңіліп жүр – бұған негізгі ойыншылардың ересектер құрамына кетуі де әсер етті.

Алайда «Шахтер» футболшы қыздары бұл жолы «Ертістен» сол ірі жеңіліс үшін есе қайтаруға ерекше ынталы болары анық. Оның үстіне, павлодарлық команданың жағдайы да мінсіз емес – соңғы турда Ксения Постова шәкірттері «Ақтөбеге» жол берді.

«Тобыл» – «Астана»

Алғашқы турда «Астана» өз алаңында «Тобылды» 2:0 есебімен ұтқан. Алайда сырт алаң ойындары елордалықтарға айтарлықтай қиынға соғады. Бірінші айналымда Болат Сағынбаев шәкірттері қонақта тек «Жетісудан» ғана үш ұпай ала алды.

Костанайлық футболшы қыздар болса, «Қайраттан» ірі есеппен жеңілер алдында төрт матч қатарынан жеңілмей, соның ішінде «Ертіс» пен «Ордабасыдан» да ұпай еншілеген. Алдағы турда олар сол сәтті жолға қайта түсе ала ма?

«Жетісу» – «Қайрат»

Бірінші айналымдағы жеті матчтың барлығында жеңіске жеткен команда осы уақытқа дейінгі барлық ойында жеңілген ұжыммен кездеседі. «Қайраттың» шабуылшысы Ангелина Остер бұл ойында гол соғып, бомбардирлік жарыста Асыл Пазылдан алыстай түсуге тырысады. Талдықорғандықтар оған кедергі бола ала ма?

«Ақтөбе» – «Ордабасы»

Бұл ойын «қызыл-ақтардың» қайта серпілген кезеңіндегі ең маңызды матчтардың бірі болмақ. Бірінші айналымдағы кездесуде жеңісті «Ордабасы» алған еді, ал бұл жолы жеңіліс Ақтөбенің медаль үшін күресін қиындатып жіберуі мүмкін.

Қазір «Ордабасы» мен «Ертістің» ұпайы бірдей – 10, ал «Ақтөбе» 9 ұпаймен бесінші орында.

Ақтөбенің соңғы жеңісті матчтарында басты рөл атқарған – Азиза Талап. Ол соңғы үш ойында бес гол соқты. Бұл көрсеткішті арттыра ала ма, әлде жоқ па – жақында білетін боламыз.