Көшбасшы мен аутсайдер, «Ақтөбенің» қызық сериясы: Freedom QJ League-тің 12-турына шолу

Еске салайық, «Тобыл» мен «Жас Қыран» арасындағы кездесу 26 тамызға шегерілді, ал «Каспий» мен «Қайраттың» ойыны, керісінше, бүгін өтеді – басталуы 18:00-де.

«Каспий» – «Қайрат»: Давид пен Голиафтың айқасы

Маусымның бірінші жартысындағы ең мықты команда турнирлік кестенің соңғы орнындағы клубпен кездеседі.

Бұл кездесудің нәтижесі алдын ала белгілі деп санайтындар, Ақтаулықтардың Алматыда «сары-қараларға» қиян-кескі қарсылас болғанын еске түсіргені жөн – 82-минутқа дейін есеп 2:2 болған. Тек Алиден Мұсаипов пен Төре Исмағұловтың голдары алаң иелеріне жеңіс сыйлады.

Өткен турда «Ақтөбеден» ойсырай жеңілгеннен кейін, «Каспий» ойыншылары бұл жолы алаңға барынша жігерлі шығатыны анық. Сондықтан бұл матч тартысты өтуі мүмкін.

«Шахтер» – «Атырау»: қателік құны – жоғары

Өткен аптада «Ордабасыға» жеңіліп, турнирлік кестеде екінші орынға нық орнығу мүмкіндігін жіберіп алған қарағандылықтар әлі де осал күйде тұр. «Жас Қыран» мен «Ертіс» олардың кез келген сәтсіздігін пайдалануға дайын.

«Атыраудан» жеңіске жету – «Шахтер» үшін маңызды, алайда «мұнайшыларды» осал санауға болмайды. Өткен турда олар Павлодардан ұпай тартып, қатарынан төрт жеңілістен кейінгі сәтсіздікті тоқтатты. Талғат Қажығалиевтің командасы бұл жолы тағы жеңілмеуге бар күшін салады.

«Ордабасы» – «Қайсар»: қонақтар тосынсый әзірлеп отыр ма?

Шымкенттіктер бұған дейін қатарынан екі көшбасшыны жеңген болатын. Оныншы турда олар соңғы минуттарда «Астанадан» жеңісті жұлып алды, ал келесі аптада «Шахтермен» сенімді жеңіске жетті.

Ал «қасқырлар» әзірге тек төменгі бөліктегі көршілерімен тең ойнаған – «Таразбен» және «Тобылмен». Бұл турда қызылордалықтар тосынсый жасай ала ма?

«Ертіс» – «Тараз»: павлодарлықтар үшін маңызды сынақ

Павлодарлықтар қатарынан төрт матчта жеңілмей келеді, бірақ өткен турда олар «Атыраумен» күтпеген тең ойын (1:1) көрсетті. Ал «Тараз» өткен аптада «Қайратқа» 1:4 есебімен есе жіберді.

Қонақтардың негізгі қақпашысы Санжар Рахматилла «Қайсармен» матчта алған қызыл қағаз үшін екі ойынға шеттетілген – сол себепті «Тараз» қақпасын тағы да Даниал Тілеубай қорғайтын сияқты. Ол бұл жолы өз командасына ұпай әкелуге көмектесе ала ма? Жауабын алаң көрсетеді.

«Астана» – «Ақтөбе»: трендтерге көз тастайық

Астаналықтардың турнирлік жағдайы оңай емес – олар төртінші орыннан төрт ұпай артта келеді. Бұған себеп – соңғы төрт ойында бірде-бір жеңіс жоқ, оның екеуі тіпті жеңіліспен аяқталды.

Ал «Ақтөбе» өте тұрақсыз формада – соңғы алты матчта үш жеңіс, үш жеңіліс.

Қызығы, бұл нәтижелер үнемі кезектесіп келеді – өткен турда «қызыл-ақтар» «Каспийді» ойсырата жеңді. Бұл заңдылық жалғаса ма, әлде Максим Габуновтың шәкірттері тізбекті үзе ме? Жақында білетін боламыз.