Рохус Шох Мадридтың «Атлетико» клубының Қазақстандағы базасына барды

Бұған дейін Рохус Рохусович Мадридке сапар жасап, «Атлетико» академиясының директоры Эмилио Гутьерреспен кездесу өткізген болатын. Тараптар ұзақмерзімді әріптестік пен болашақ бірлескен жобалар туралы келісімге келді.

Қазақстандағы Мадрид ұжымының базасына сапар осы бағыттағы тағы бір маңызды қадам болды – Рохус Рохусович академияның инфрақұрылымымен танысып, клуб өкілдерімен мазмұнды кездесу өткізді.

«Біз жаттықтырушылар құрамымен, академияда жұмыс істеп жатқан испан және қазақстандық мамандармен таныстық. Сондай-ақ еліміздің әр өңірінен шақырылған 2012–2013 жылғы дарынды балалармен де кездестік. Қазіргі таңда олар іріктеуден өтуде.

Мен қатты әсерлендім. Жасөспірімдер футболында оң өзгерістер бар екені байқалады, бүтін бір инфрақұрылым қалыптасып келеді.

Мұнда «Атлетиконың» балалар бапкерлері, үздік мамандар, соның ішінде фитнес-жаттықтырушылар да жұмыс істейтін болады. Олар өз әдістемелерін енгізіп, тәжірибесімен бөліседі, біздің мамандарды оқытады. Бұл – өте маңызды.

Жас спортшылар үшін тамаша жағдайлар жасалған. Арнайы спорттық тамақтану мәзірін қадағалайтын диетолог бар – бәрі жоспарлы әрі дұрыс ұйымдастырылған.

Тұрғын жай да қарастырылған: әр бөлмеде екі адамнан тұрады, барлық интерьер ұсақ-түйегіне дейін «Атлетико» брендімен безендірілген: жастықтар, жамылғылар, сүлгілер. Қабырғаларда футболшылар мен Диего Симеоненің суреттері ілулі, әр бөлмеде – әртүрлі. Тіпті сыртта да клубтың символы – аю қойылған.

Инфрақұрылымның бір бөлігі қазірдің өзінде дайын: керемет 25 метрлік бассейн, екі жаттығу залы, теориялық сабақтар мен жиналыстарға арналған кабинеттер, асхана – барлығы жоғары деңгейде. Жаңа, сапалы жасанды алаң салынған, қазіргі таңда жаттығулар сол жерде өтіп жатыр.

Тұтас концепция аясында алты алаң салу жоспарланған: екеуі – табиғи шөпті, төртеуі – жасанды, сонымен қатар толыққанды жабық манеж болады. Болашақта 10 мың орындық стадион салу жоспарланған, себебі өз командасын құрып, кәсіби лигада ойнауды көздеп отыр. Бұл – тамаша бастама: балалардың өз клубы, өз туы болады, дәл осы Қазақстанда.

Біздің елде жас футболшылар мен болашақ резервті дайындайтын жаңа, заманауи академиялардың пайда болуы – қуанышты жайт. Бұл енді жай қағаздағы жоба емес, нақты іске асып жатқан жоба.

Бізде жақсы, нәтижелі кездесу өтті, және алдағы жылдары барлық регламент пен лицензиялау талаптары сақталған жағдайда, Қазақстандағы «Атлетико Мадрид» академиясы Freedom QJ League-де ойнай алады деп үміттенеміз.

Іріктеуден өтіп жатқан балалар маған келіп: «Біз ойнай аламыз ба? Біз қатты қалаймыз!» – деп сұрады. Олар мені Лига жобасының жетекшісі ретінде танып, дәл осы Лигада ойнағылары келетінін айтқан кезде маған өте жағымды әсер қалдырды. Бұл керемет болар еді: сенімдімін, олар бәсекеге қабілетті командалар жасақтай алады», – деп қорытындылады сапарын Рохус Шох.

Еске салайық, Мадридтің «Атлетико» клубы Freedom QJ League құрамасының қарсыласы болатын QJL All Star матчында бақ сынайды.

Маусымның басты оқиғасы елдің оңтүстік астанасында 23 тамыз күні өтеді.