Қыздар турнирінде өткен матчтардың басты сәттерімен бөлісеміз.
«Қайрат» ірі есеппен жеңді, бірақ қақпасын құрғақ сақтай алмады
Алматылық футболшы қыздар «Ақтөбені» 5:1 есебімен ойсырата ұтып, маусымның басты фавориті деген мәртебесін дәлелдеді.
Бәрі Ангелина Жданованың автоголынан басталды, одан кейін Жания Махаш пен Милена Николенко үзіліске дейін-ақ есепті ірі қылды.
55-минутта Ангелина Кленова төртінші допты соқса, 68-минутта «ақ-қызылдар» Айжан Есіркепованың күшімен бедел голын соғып үлгерді – бұл «Қайраттың» осы маусымда жіберіп алған алғашқы добы.
Ал матчтың нүктесін 77-минутта пенальтиді сәтті орындаған Жания Махаш қойды.
Зарлыхан «Қайсарға» қыздар турниріндегі алғашқы жеңісті сыйлады
Freedom QJ League W дебютанттары – «Қайсар» футболшылары өткен турда тартысты кездесуде «Ордабасыдан» басым түсіп, алғашқы ұпайларына қол жеткізді.
Қызылордадағы матчта есепті бірінші болып қонақтар ашты – 4-минутта-ақ Балнұр Ергешбек гол соқты. Алайда алаң иелерін ойынға 14 жасар шабуылшы Шәмсия Зарлыхан қайта алып келді. Бірінші таймның сегіз минутында дубль жасап, үзілістен кейін үшінші добын соққан ол командасына тарихи жеңіс сыйлап қана қоймай, 4 голмен сұрмергендер жарысында көш бастады – бұған дейін Шәмсия «Шахтер» қақпасын дәл көздеген болатын.
«Ордабасы» бұл перформансқа тек Данагүл Нұрбайдың голымен ғана жауап қайтара алды – таблодағы қорытынды есеп 3:2. Екінші турдан кейін Шымкент командасы – әзірге еншісінде ешқандай ұпай жоқ жалғыз ұжым.
Павлодардағы 1:4 есебі
«Астана» чемпиондық жарыста «Қайраттан» қалыс қалмауға ниетті – өткен турда елордалық футболшылар «Ертісті» сенімді түрде жеңді.
Павлодарлық команда 12-минутта Анастасия Гордееваның голының арқасында есепте алға шыққан еді. Алайда кейін алаң иелерінен сәттілік теріс айналды – алдымен 35-минутта Дамира Мақсат таразы басын теңестірсе, содан соң Валерия Косареваның автоголы қонақтарды алға шығарды. Екінші таймда «Астана» Жібек Марат пен Альзия Жамбылдың дәл соққыларының арқасында басымдықты бекіте түсті – 1:4.
«Шахтер» мен «Тобыл» тең тарқасты
Қарағандыдағы матч голсыз аяқталды – «Шахтер» мен «Тобыл» ұпай бөлісті. Кездесу хаттамасындағы жалғыз елеулі сәт – 80-минутта Айсұлу Әбенованың алған сары қағазы болды.
Қостанайлық футболшылар үшін бұл маусымдағы алғашқы ұпай, ал «кеншілердің» еншісінде төрт ұпай бар және олар турнирлік кестеде «Қайрат» пен «Астанадан» кейін бірден үшінші орында келеді.
.webp)
