Қателіктің құны артуда: флагмандық турнирдің 9-шы турына превью

«Ертіс» – «Қайсар»

Турнирлік кестенің төменгі бөлігіндегі екі команда өзара кездесуде құнды ұпайлар үшін бақ сынайды. «Ертіс» соңғының алдындағы 11-орында тұр және олардың еншісінде 4 ұпай бар, ал 9-орында келе жатқан «Қайсар» олардан 5 ұпай артық жинаған. Олардың арасында 8 ұпаймен «Тараз» орналасқан. Осылайша, алаң иелерінің жеңілісі олардың жағдайын айтарлықтай қиындатады.

Айта кетейік, «Қайсар» сегіз тур ішінде бірде-бір матчты тең есеппен аяқтаған жоқ – үш жеңіс және бес жеңіліс. Бұл жолы қалай болар екен?

«Қайрат» – «Жас Қыран»

Алматылық дербидің қос команда үшін де маңызы зор – бұл тек символикалық текетірес емес.

Мәселе мынада: «Қайрат» осы уақытқа дейін турнирде мінсіз келе жатыр – сегіз турдан кейін сегіз жеңіс, 38 соғылған гол және жіберілген тек бір ғана доп. «Сары-қаралар» үстемдік құрып тұр және бұл мәртебесінен айырылғысы келмейді.

Өз кезегінде «Жас Қыран» тоғызыншы турдың алдында көшбасшыдан бірден сегіз ұпай қалып қойып, үшінші орында тұр. Олардың алдында 20 ұпайы бар «Шахтер» орналасқан, ал алматылықтарда 16 ұпай бар. «Қайраттан» жеңілген жағдайда, қонақтар фавориттерден артта қалып қана қоймай, өздерінің соңынан еріп келе жатқан қуғыншылар тобын жақындатып алу қаупі бар.

Кезекті кездесуді «Жас Қыранның» қорғаушысы Салим Минжулин өткізіп алады. Ол 6-шы турда финалдық ысқырықтан кейінгі спорттық емес мінез-құлқы үшін бес матчқа шеттетілген болатын. Оған тағы үш ойынды жіберіп алу қалды – Fantasy QJ League-де құрам жинау кезінде жанкүйерлер осы жайтты ескеруі қажет.

«Шахтер» – «Каспий»

Өткен маусымның қола жүлдегерлері «Қайратты» өкшелей қууды және басты фавориттің сүрінуін күтуді жалғастыруда. Дегенмен, 8-ші турда «кеншілердің» өздері қателікке бой алдырды – «Ордабасымен» матч 1:1 есебімен тең аяқталғаны есімізде. Енді олар қайтадан жеңіс жолына түсуге тырысады.

«Каспийдің» жағдайы әлі де мәз емес: «Қайсарды» жеңгеннен кейін ақтаулықтар қайтадан жеңілістер сериясына тап болды, қазіргі уақытта бұл серия үш матчқа жетті.

Флагмандық турнирдің үздік сұрмергені – «Шахтердің» жартылай қорғаушысы Расул Акимов – өткен турда Шымкентте нәтижелі іс-қимылдарымен көзге түсе алмай, өзінің үш матчтық голдар шеруін тоқтатты. Ол алдағы кездесуде көздеген нысанасын дәл таба ала ма?

«Астана» – ҚФФ академиясы

«Жас Қыранның» сүрінуін күткен «Астана» мен ҚФФ академиясы жүлделі үштікке жақындау мүмкіндігі үшін таласады. Екі команданың да қоржынында 10 ұпайдан бар, ал тең ойын ешкімге турнирлік позицияны жақсарту тұрғысынан айтарлықтай артықшылық бермейді – демек, қарсыластар тек жеңіс үшін ойнайды.

«Ақтөбе» – «Тобыл»

Сонымен қатар, үздік алтылықта медальдар үшін күресуге амбициясы бар басқа да командалар бар. «Ордабасымен» қатар, «Ақтөбе» мен «Тобылдың» еншісінде 11 ұпайдан бар және олар тең ойынға немесе жеңіліске жол бере алмайды – әсіресе «Жас Қыран» «Қайратты» сан соқтырған жағдайда.

Бұл кездесу жанкүйерлер үшін өте тартымды болмақ, өйткені бұл қазақстандық классикалық футбол текетірестерінің бірінің жасөспірімдер арасындағы нұсқасы. Турнирлік маңыздылық пен символикалық рөлдің ұштасуы көрермендерге қызықты екі сағатты сыйлайтыны анық.

«Тараз» – «Ордабасы»

Ақырында, «Жас Қыранды» қуушылардың тағы бірі – шымкенттік «Ордабасы» – алдағы турда «Таразбен» кездеседі.

Алаң иелері кестеде оныншы орында тұрғанына қарамастан, алдағы кездесудің нәтижесін алдын ала болжау қиын. Бұл соғылған және жіберілген доптар айырмашылығының жақындығына байланысты. «Ордабасыда» бұл көрсеткіш 13-13 болса, «Таразда» – 12-16. Сонымен қатар, Самат Наурызбаевтың шәкірттері осы маусымда өз алаңында бірде-бір рет жеңілмеген.

«Таразға» қосымша мотивация беретін жайт – жеңіс команданы үздік алтылық, тіпті жүлделі орындар үшін күреске қайта қосуы мүмкін, өйткені турнирлік кестенің ортасы өте тығыз болып тұр. ```