Рохус Шох «Тараз» футбол орталығына барып келді

Рохус Рохусович клубтың футбол орталығының инфрақұрылымын, соның ішінде «Жастар» стадионының алаңын тексеріп, оны Лиганың лицензиялау стандарттарына толық сәйкестендіру бойынша ұсыныстарын берді.

Ол сондай-ақ «Тараз» басшылығымен кездесіп, өңірдегі жасөспірімдер футболын одан әрі дамыту перспективаларын, соның ішінде клубтың әйелдер командасын Freedom QJ League қатысушыларының қатарына қосу мүмкіндігін талқылады.

Сапар бағдарламасындағы тағы бір маңызды шара Рохус Шохтың жаттықтырушылармен, жас футболшылармен және олардың ата-аналарымен кездесуі болды.

«Келгеніме өте қуаныштымын. Мен үшін бұл — туған қалам, өскен мектебім, өз өлкем. Лиганың амбассадоры әрі ақсақалымыз Ваит Абдул-Хамидович Талгаевпен бірге осындай кездесу өткіздік.

Мұнда жаттықтырушылар да, ойыншылар да, ата-аналар да болды. Атқарып жатқан жұмысымыз туралы айтып, бәрін тағы бір рет көрсетіп, түсіндірдік.

Тек қана алғыс сөздерін естідік, бұл біз үшін өте маңызды. Сонымен қатар, осындай ауқымды жобаны қаржыландырғаны үшін Тимур Турловқа және Freedom Holding Corp. компаниясына алғыс айтылды. Лига үлкен әлеуметтік және спорттық даму әкеліп жатыр, оны бәрі түсінеді.

Бірақ ең бастысы — біз кері байланыс алдық. Меңдеп қалған өзекті мәселелерді, соның ішінде мектеп пен инфрақұрылымды дамыту жайын білдік. Кездесу өте қызықты, пайдалы әрі маңызды өтті. Мұндай іс-шараларды алдағы уақытта басқа өңірлерде де міндетті түрде өткіземіз деп ойлаймын.

Әрине, менің туған, сүйікті қалам — Таразда проблемалар аз емес. Бүгін облыстық спорт басқармасының басшыларымен кездестім. Соның ішінде олар жаңартқан «Жастар» стадионының атышулы алаңын да талқыладық. Ол қажетті сапаға сай келмейді.

Бүгін облыстық спорт басқармасының басшысы жыл соңына дейін төсенішті қайта төсеп, заманауи алаң жасап беруге уәде берді. Мен бұл туралы ата-аналарға айттым, олар мұндай уәденің берілгеніне өте қуанышты. Бұл уәде орындалады деп сенеміз.

Балалар мен жасөспірімдер футболы дұрыс жолға қойылғанда ғына жүйе қалыптасады. Клубтың болашағын тек осы іргетастың негізінде ғана құруға болады», — деп қорытындылады Рохус Рохусович.

«Қазақстанның балалар мен жасөспірімдер футболын дамытуға үлкен үлес қосып жүрген Freedom QJ League жетекшісі Рохус Шох сияқты тұлғаның қатысуымен кездесу өткізу уақыты әлдеқашан келген сияқты еді.

Лига президенті көтерген мәселелер өте орынды және оларды талқылау қажет. Бізге, шынымен де, балалар футболын дамытуға көбірек көңіл бөлу керек.

Freedom QJ League-дағы орнымызды сақтап қалғанымыз — үлкен жетістік. Бұған бізге көмектескен Рохус Шохтың да еңбегі сіңді.

Бірақ тек біреуге сеніп отыруға болмайды. Өз мүмкіндіктерімізді тауып, өз кадрларымызды тәрбиелеуіміз керек, өңірдегі футболдың дамуына атсалысып, бізге көмектесетін адамдарды іздестіруіміз қажет.

Рохус Шохтың келуі көзқарастардың өзгеруіне және жағдайдың жақсаруына әсер етеді деп есептеймін. Кем дегенде, біз бұған үміттенеміз», — деп өз пікірімен бөлісті «Тараз» U-17 командасының бас жаттықтырушысы Асқар Күшікбаев.