Freedom QJ League U-17, U-16, U-15: 6-турдың басты оқиғалары

Freedom QJ League U-17

«Қайрат» пен «Шахтер» мінсіз сериясын жалғастырып жатыр

U-17 турнирінің екі көшбасшысы кезекті рет өз матчтарында жеңіске жетті.

«Қайрат» Қызылордада «Қайсарды» 5:0 есебімен жеңіп, 18 ұпайдың 18-ін жинады. Тамерлан Сарсымбаев дубль жасады, тағы бір-бір голды Ақмади Жұмахан, Ибрахим Асан және Алан Асхатұлы соқты. Дарын Ибадильда екі нәтижелі паспен көзге түсті. Есеп бұдан да ірі болуы мүмкін еді: бірінші таймның соңында Нұрхад Нұрымовтың пенальтиден бағыттаған соққысын «қасқырлар» қақпашысы Аламин Сапарбай қайтарды.

Айта кетерлігі, Аламин алаңға 11 метрлік айып добынан сәл бұрын ғана шыққан еді. «Қайсар» матчты қақпада Никита Маскаевпен бастаған, бірақ 39-минутта ол қарсыласты айқын гол соғу мүмкіндігінен айырғаны үшін алаңнан қуылды. Сондықтан алаң иелері екінші таймды кем құрамда өткізді.

Ал «Шахтер» туралы айтсақ, екінші фаворит мінсіз сериясын ҚФФ Академиясын сырт алаңда 3:0 есебімен жеңу арқылы жалғастырды. Никита Духов дубль жасады, тағы бір голды Ельдар Жолдіқанов соқты.

«Сары-қаралар» мен «кеншілердің» жақын қуғыншылары болып «Ордабасы» жасөспірімдері қалып отыр – өткен турда «Каспийді» жеңгеннен кейін олардың еншісінде 16 ұпай бар.

Ақтөбедегі дубльдер

«Ақтөбе» футболшылары өз алаңында «Ертісті» жеңіп, жанкүйерлерін қуантты.

Бастапқыда кездесудің алғашқы голын павлодарлықтар соқты – 12-минутта Ислам Юрий көзге түсті. Бірақ матч ақырында 4:1 есебімен аяқталды: Мирас Нұрланов пен Арсен Байжанов екі-екіден гол соқты. Нұралы Бижановтың да өзіндік дублі бар – ол «қызыл-ақтардың» соңғы екі голына нәтижелі пас берді.

«Тобылдың» алғашқы жеңісі – соңғы минуттарда!

Қостанайлық клуб U-17 турниріндегі алғашқы жеңісіне ақыры қол жеткізді – өз алаңында «Таразды» жеңді. Бұл оңай болған жоқ.

5-минутта алаң иелерінің форварды Ерасыл Сейдахметов 11 метрлік айып добын орындау мүмкіндігіне ие болды. «Тараз» қақпашысы Дінмұхамед Мейірхан соққыны қайтарды, бірақ допты ұстап қала алмады, ал Ерасыл қарымта соққыда мүлт кеткен жоқ.

Қақпаға 21 соққы жасағанына қарамастан, қонақтар «Тобылға» бір ғана гол соға алды – 75-минутта есеп теңесті. Матч аяқталуға жақындап, командалар тең ойнайтындай көрінген. Алайда қосылған уақытта Нұрсұлтан Тосбатыр гол соғып, қостанайлықтарға аса маңызды үш ұпай сыйлады.

Freedom QJ League U-16

«Каспийдің» алғашқы жеңісі – көшбасшылардың біріне қарсы!

Ақтаулық команда өз алаңында «Ордабасыны» 3:2 есебімен жеңіп, турнир кестесінің соңғы орнынан көтерілді.

«Каспийдің» алғашқы жеңісінің басты қаһармандары Аслан Жолды мен Рахманберді Александр болды. Аслан дубль жасаса, Рахманберді 1+1 нәтижесін көрсетті. Қонақтар сапынан Жасұлан Тойлыбай мен Даниал Сағындилда бір-бір голдан соқты. Алайда шымкенттіктердің мүмкіндігі әлдеқайда көп болды – олар қақпаға 20 соққы жасап, соның 11-ін қақпа жақтауына бағыттады.

Бұл «Ордабасының» қатарынан екінші жеңілісі оңтүстіктіктердің жағдайын едәуір қиындатты. Олар турнир кестесіндегі үшінші орнын сақтап қалғанымен, екінші орында тұрған «Қайраттан» төрт ұпайға қалып келеді. Ал әзірге не тең ойын, не жеңіліс көрмеген көшбасшы «Шахтерден» шымкенттіктерді бірден алты ұпай бөліп тұр.

Freedom QJ League U-15

Ғарифуллиннің керемет перформансы

2012 жылы туған ойыншылар арасындағы өткен турдың басты хайлайты «Тобыл» форварды Артур Ғарифуллиннің «Таразға» қарсы сырт алаңдағы жарқын ойыны болды.

Еске салайық, Freedom QJ League U-15 аясында негізгі уақыт 80 минутқа созылады. 70-минутқа қарай оңтүстіктіктер 3:2 есебімен алда тұрды. Ғарифуллиннің голы мен нәтижелі пасы «Тобылға» қатарынан екі гол жібергеннен кейін есепті теңестіруге көмектескен еді, бірақ алаң иелерінің шабуылшысы Артур Батырбай дубль жасап, өз командасының басымдығын қайта бекітті.

Алайда Артур 1+1 нәтижесімен тоқтап қалмай, кездесудің ең соңында бірден үш гол соқты – соңғысын қосылған минуттарда енгізді. Осы жеңістің арқасында «Тобыл» көшбасшы «Қайраттың» соңынан қалмай келеді: әзірге бірде-бір рет сүрінбеген «сары-қаралардан» үш ұпайға қалып тұр.

Осылайша Ғарифуллин өткен ойын қорытындысы бойынша покер және нәтижелі пас жасады. Ал алты турдың қорытындысында оның еншісінде 11 гол мен 2 ассист бар.

Өткен аптада Артур «Болашақ ойыншысы» жобасы аясындағы алғашқы жеке жаттығудың басты қатысушысы болды – ол әлі қанша гол соғар екен?

«Ақтөбе» көшбасшылардан қалмай келеді, «Астана» соңғы сәтте құтылды

Турнир кестесінде үшінші орында «Ақтөбе» тұр – 13 ұпай. Өткен турда «қызыл-ақтар» сырт алаңда «Ертісті» 2:0 есебімен жеңді. Жеңісті Милан Надрышиннің дублі қамтамасыз етті. «Қайраттан» жеңіліп, «Шахтермен» тең түскеннен кейін Ермек Темірзақов шәкірттері сәтті жолға түскендей – бұл олардың қатарынан екінші жеңісі.

Келесі орында «Астана» орналасқан. Елордалық команда «Жас Қыранмен» ойында ұпай жоғалтуға шақ қалды – алаң иелеріне жеңісті қосылған уақытта Самғат Толыбайдың голы әкелді. Айта кету керек, «Астана» үш ұпайды кем құрамда жүріп алды – 52-минутта Ислам Тұрақбаев алаңнан қуылды.

6-турдан кейінгі үздік сұрмергендер

Freedom QJ League U-17: Тимур Тугамбеков («Жас Қыран») және Тамерлан Сарсымбаев («Қайрат») – 7 голдан;
Freedom QJ League U-16: Балахмет Адилбек («Тобыл») – 7 гол;
Freedom QJ League U-15: Артур Ғарифуллин («Тобыл») – 11 гол.

6-турдан кейінгі үздік ассистенттер

Freedom QJ League U-17: Темірлан Әбжапар («Қайрат») – 5 голдық пас;
Freedom QJ League U-16: Дамир Алибаев («Тобыл») – 5 голдық пас;
Freedom QJ League U-15: Илфрат Елакаев, Диас Әбубәкір (екеуі де – «Қайрат»), Рафаэль Есжанов («Астана») және Санжар Байдәулетов («Ақтөбе») – 4 голдық пастан.