Беделді халықаралық Workspace Digital Awards сыйлығының төртінші маусымының марапаттау рәсімі өтті.
«Өнімдік брендинг» номинациясы бойынша екінші орынды платформаның өзін жасап шыққан Brele дизайн-бюросымен бірлесіп әзірленген FF Manager айдентикасы иеленді.
Айдентика платформаның логотипін, түстер мен типографиялық шешімдер жиынтығын, негізгі графикалық элементтерді, сондай-ақ фирмалық атрибутика мен кәдесый өнімдерінің топтамасын қамтиды.
Брендинг бойынша тікелей жұмыс басталмас бұрын, команда жаттықтырушыларымен және Лига мамандарымен кеңестер жүргізілді.
«Визуал және коммуникация арқылы біз қарапайым, бірақ маңызды ойды жеткізгіміз келді: біз сізді көріп тұрмыз, біз бір тілде сөйлесеміз, сіз – өнімнің орталығысыз. FFM-ді жоғарыдан таңылған құрғақ аналитикалық құрал ретінде емес, жаттықтырушыларға арналған және олар туралы құрал ретінде қабылдау маңызды болды. Бұған қол жеткізу үшін біз айдентиканы жаттықтырушылардың шынайы өміріне: алаңға, тактикалық схемаларға, құрал-жабдықтарға және олардың әлеміндегі басқа да заттарға негіздеп құрдық», – деп түсіндірді Brele өкілдері тұжырымдама таңдауын.
Қазіргі уақытта спорттық-сараптамалық бөлім мамандары Шымкентте Лига командаларының жаттықтырушыларына арналған семинар өткізіп жатыр – оның қатысушыларына осы топтамадағы фирмалық футболкалар табыс етілді. Осындай сыйлық Астанада өтетін келесі семинардың қатысушыларын да күтеді.
Атқарылған жұмыстың арқасында FF Manager өзінің визуалды тіліне ие болды. Ол платформаның ерекшелігін айқындап, оны жаттықтырушының көмекшісі ретінде қабылдауға көмектеседі, сонымен қатар спорттық-аналитикалық блокты мықты сараптамасы бар дербес әрі көрнекті брендке айналдырады.
Бұл – FF Manager платформасының Workspace Digital Awards аясындағы алғашқы марапаты емес. Өткен жылы платформа «Сайттар» номинациясында бірінші орынды жеңіп алған болатын. Сондай-ақ, жоба Tagline Awards және MARSPO Awards сияқты сыйлықтар аясында да көптеген марапаттарға ие болды.
