Бүгін Лига ойыншыларына арналған дәстүрлі кибертурнирдің іріктеу кезеңі өтеді.
Freedom QJ League Cyber Cup тарихында алғаш рет матчтар EA FC жасыл алаңында емес, футболшылар үшін ерекшелеу бағыт – Counter-Strike 2 пәні бойынша ұйымдастырылады.
Ортаның өзгеруі балаларға үйреншікті атмосферадан серпілуге мүмкіндік береді, ал шутердегі командалық рух клубтастарды бұрынғыдан да бетер біріктіре түсетіні анық.
Іріктеу турнирі төрт топты қамтиды.
А тобы: «Жеңіс», «Оңтүстік», «Ертіс», «Оқжетпес», «Жайық», «Ордабасы».
В тобы: «Атырау», «Хан-Тенгри», «Қайсар», «Жас Қыран», «Ақтөбе».
С тобы: «Тобыл», «Атлетико», «Тараз», «Астана», «Каспий».
D тобы: «Шахтер», ҚФФ Академиясы, «Елімай», «Алтай», «Қайрат».
Төрт жас ерекшелігі санатының (U-15-тен U-18-ге дейін) намысын қорғайтын командалар топтарға кездейсоқ түрде бөлінген. Топтық кезеңнің матчтары айналмалы жүйе бойынша BO1 (Best of 1) форматында өтеді.
Әр топтан үздік шыққан екі команда 6-7 маусым аралығында өтетін LAN-кезеңге жолдама алады.
