«Ертіс» сүрінген жоқ

Былтыр «Ақсу» U17 турнирінің алғашқы матчында жеңіске жеткен еді, бірақ екінші турда сүрінді. Енді бұл жігіттер бір жасқа өсіп, негізгі жарысқа қатысып жатыр – және осы жолы екінші турда да жеңіске жетті.

Бұл жеңіс болмауы да мүмкін еді. Павлодарлықтар сырт алаңда «Тараздан» 69-минутқа дейін 0:1 есебімен жеңіліп жатты, алайда қалған жиырма минут ішінде екі гол соқты – жеңіс добы негізгі уақыттың соңында қарсылас қақпасына енді.

Қазір «Ертіс» Freedom QJ League турнирлік кестесінде екі жеңіспен екінші орында тұр – тек голдар айырмашылығы жақсырақ болғандықтан, «Қайрат» олардан жоғары орналасқан.

Бірінші турдың қаһарманы Руслан Рахметов бұл матчқа қатысқан жоқ – еске сала кетейік, жарқын ойынынан кейін ол ересектер командасының жаттығуларына шақыртылған болатын.

Айта кету керек, 2009 жылы туғандар арасындағы матчта «Ертістің» ойыншысы Тамерлан Шоканов ерекше көзге түсті – ол хет-трик авторы атанды, ал табло нәтижесі павлодарлықтардың пайдасына 5:2 есебін көрсетті.

«Тараздың» жалғыз жеңісі U16 турнирінде тіркелді – матчтағы жалғыз голды Бекнұр Талғатұлы соқты.

«Қайраттың» екі сүрінуі

U17 турнирінде «Қайсарды» ірі есеппен жеңіп, жарысты сәтті бастаған алматылықтар өз алаңында «Каспиймен» ойында ұпай жоғалтты – 90 минут ішінде ешбір команда қарсылас қақпасына гол соға алмады. Ал U16 командалары арасындағы матчта да тең нәтиже тіркелді, бірақ бұл жолы тартысты өтті – Йахья Байменовтің голына ақтаулық клубтан Аслан Төлебай дәл соққымен жауап берді.

Ал негізгі турнирде «сары-қаралар» фаворит мәртебесін ақтап, Ақтаудың клубын 4:2 есебімен жеңді. Барлық голды әртүрлі ойыншылар соқты: Абылай Төлеухан, Санат Нұрболат, Алиден Мусаипов және Төре Исмағұлов. Ал «Каспий» сапында Әбілқайыр Жармұхамет пен Шахмардан Демесін көзге түсті.

Қазір Төлеухан мен Руслан Рахметов сұрмергендер жарысында көш бастап тұр – екеуінің де үш голдан бар.

«Тобылдың» сәтсіздігі

Қостанайлық клуб сырт алаңда «Жас Қыранмен» кездесіп, барлық үш матчта жеңіліп қалды. Ең ауыр жеңіліс U17 турнирінде тіркелді – негізгі уақыттың соңында таблода қонақтар үшін өте жағымсыз 11:0 есебі тұрды.

Мұндай айырмашылықпен жеңілген «Тобыл» А лигасындағы өз антирекордын қайталады – еске салайық, өткен жылы негізгі турнирде «Қайрат» қостанайлықтарды 12:1 есебімен ұтқан болатын. Ал В лигасында рекорд ретінде 2024 жылы тіркелген «Жетісу» мен «Ұлытау» арасындағы 13:0 нәтижесі сақталып тұр.

Сергей Масленовтың командасы қатарынан екінші ойында да гол соға алмай отыр – ал екі матчтың қорытындысы бойынша қақпасына 18 гол жіберіп алды.

Турдың ең нәтижелі матчтары

Freedom QJ League: «Қайрат» – «Каспий» (4:2).

Freedom QJ League U-17: «Жас Қыран» – «Тобыл» (11:0).

Freedom QJ League U-16: «Атырау» – «Шахтер» (3:2).

Aksu 2006