Қыздар турнирінің қорытындысын шығарамыз.
Қола жүлде «Шахтерге» бұйырды
Турдың басты интригасы үшінші орынның тағдыры болды – қола жүлдеге бірден үш команда таласты.
«Тобыл» мен «Шахтер» 20 ұпайдан жинаған еді, қосымша көрсеткіштер бойынша қостанайлықтар үшінші орында тұрды. 17 ұпайы бар «Ақтөбе» де сәтті сценарий орындалған жағдайда жүлдеге математикалық мүмкіндігін сақтап қалды – «қызыл-ақтар» «Тобылды» жеңіп, ал «Шахтер» өз матчында жеңілген жағдайда тұғырға көтеріле алатын еді.
Нәтижесінде «Ақтөбе» «Тобылды» 2:0 есебімен жеңсе, параллель өткен ойында «Шахтер» «Астанамен» 2:2 есебімен тең түсті. «Золушки» 21 ұпай жинап, 20 ұпайда қалған қарсыластарын басып озды.
Бұл – «Шахтердің» Freedom QJ League W тарихындағы алғашқы жүлдесі. Еске салайық, өткен маусымда қола медаль «Ертіске» бұйырған еді.
«Ертіс» «Ордабасының» көңіл күйін түсірді
Шымкентте «Ордабасы» өз алаңында күтпеген жерден «Ертіске» есе жіберді. Павлодарлықтар 2:1 есебімен жеңіске жетіп, бірінші айналымдағы 1:5 есебімен болған жеңілістің есесін қайтарды. Қонақтағы жеңістен кейін «Ертіс» ұпай саны бойынша «Ордабасымен» теңесті – екі командада да 13 ұпайдан, – дегенмен қосымша көрсеткіштер бойынша алтыншы орын шымкенттік команданың еншісінде қалды.
«Қайрат» маусымға жарқын нүкте қойды
Қазіргі чемпиондар маусымды жыл бойы көрсеткен сенімді ойынына сай аяқтады – сырт алаңда «Қайсарды» 10:0 есебімен ойсырата жеңді. Бір қызығы, бірінші айналымда да «Қайрат» дәл осы есеппен басым түскен еді.
Жеке жетістіктер
Өткен маусымдағыдай, чемпионаттың үздік сұрмергені Милена Николенко («Қайрат») атанды – 33 гол. Оның бірде-бір добы пенальтиден соғылған жоқ. Маусымның үздік ассистенттері де оның командаластары Жания Махаш пен София Ягудина болды – әрқайсысы 14 нәтижелі пас берді.
