Freedom QJ League B турнирінің соңғы турын қорытындылаймыз.
Бірден үш команда чемпиондық атаққа таласты – сондықтан Лига өкілдері алтын медальдардың бір-бір жиынтығын Алматыға, Оралға және Балпық Биге алып барды. Матчтардың нәтижесі бойынша олар дәл оңтүстік астанада қажет болды.
«Хан-Тенгри» – чемпион!
«Хан-Тенгри» 39 ұпай жинап, турнир жеңімпазы атанды. Алматылықтар ең жақын қарсыластарын небәрі екі ұпайға басып озды.
Алматылықтардың «Атырауға» қарсы өз алаңындағы матчы 3:1 есебімен аяқталды. Есепті қонақтар ашты – 25-минутта Нұрбек Амангелді мергендік танытты. Тимур Дешконың дублі жағдайды өзгертсе, ойын соңында Абдулкарим Сексембай нүкте қойды.
Бүгін Алматыда Қала күні аталып өтуде – сондықтан «Хан-Тенгридің» чемпиондығы ерекше символикалық мәнге ие болды.
Балпық Бидегі сенсация
Соңғы тур алдында чемпиондыққа басты фаворит «Жеңіс» еді. Атақтың тағдыры елордалық команданың сүрінуінің нәтижесінде шешілді.
Көшбасшыны чемпиондықтан айырған команда «Жетісу» болды. Балпық Бидегі матч минималды есеппен аяқталды – кездесудің соңғы сәттерінде алаң иелерінің шабуылшысы Ернұр Ташмұхамбет шешуші голды соқты. Бұл оның маусымдағы жалғыз голы болды.
«Жеңістің» жеңілісіне әсер еткен маңызды факторлардың бірі – 58-минутта Ердәулет Исмаиловтың алаңнан қуылуы. Қорғаушы екінші сары қағазын алды.
Елордалық клуб үшін маусымды екінші емес, үшінші орында аяқтау тіпті өкінішті болды – күміс медальдар «Жайыққа» бұйырды.
«Жайық» пен «Оқжетпестің» голға толы матчы
Оралдағы кездесу турдағы ең нәтижелі матч болды – «Жайық» голға толы тартыста «Оқжетпесті» минималды басымдықпен жеңді (5:4).
Көкшетаулық қонақтар есепті 1-минутта ашқанымен, 63-минутқа қарай алаң иелері үш доп айырмасымен алда тұрды – 5:2. Алайда матч соңында «Жайық» жанкүйерлеріне қобалжуға тура келді – Арсен Араповтың пенальтиден соққан добы мен Анар Мирзаевтың голы интриганы қайта жандандырды.
Дегенмен Орал командасы үш ұпай алып, жеңіліске ұшыраған «Жеңіспен» ұпай санын теңестірді. Барлығын қосымша көрсеткіштер шешті: екі өзара кездесуде де «Жайық» елордалық команданы жеңгенін еске салайық – 2:0 және 1:0.
Турнир кестесінің ортасы мен төменгі бөлігі
Төртінші орынды «Жетісу» (29 ұпай) иеленді. «Оқжетпес» (26) маусымды қатарынан үш жеңіліспен аяқтап, бесінші орынға тұрақтады. Соған қарамастан, соғылған гол саны бойынша (42) команда лигада үшінші орында.
«Атырау» мен «Оңтүстік» 22 ұпайдан жинап, доп айырмасы да бірдей болды (-3), алайда алтыншы орын өзара кездесулер нәтижесі бойынша «Атырауға» бұйырды: бірінші айналымда 0:3 есебімен жеңіліп, екінші айналымда 4:0 есебімен жеңіске жетті. Сегізінші орынға «Елімай» (17) жайғасты.
Кестені «Қызылжар» (14 ұпай) мен «Алтай» (13) түйіндеді. Турнирдің басты аутсайдері болған «Алтай» чемпионатты көтеріңкі көңіл күймен аяқтады – команда қатарынан екі рет жеңіске жетті, соның ішінде бүгін Петропавлда 3:0 есебімен басым түсті.
Жеке жетістіктер
Маусымның үздік сұрмергені Жанәді Жұмабек («Хан-Тенгри») атанды – 12 гол, оның ешқайсысы пенальтиден соғылған жоқ. Сондай-ақ ол «гол+пас» жүйесі бойынша да көш бастады – 17 ұпай.
Үздік ассистенттер Нұралы Сабыржан («Оқжетпес») мен Алексей Побережный («Жайық») атанды – әрқайсысы 6 нәтижелі пас берді.
