Рекордтық нәтиже мен жүлделі үштіктегі өзгерістер: Freedom QJ League W 9-турының шолуы

«Ордабасы» – үздік үштік қатарында!

Шымкенттік команда турнирлік кестеде көршілері – «Ертіс» командасын жеңіп, жүлделі үштікке енді. Бұл кездесуде алғашқы голды павлодарлық команда соққан – 10-минутта Анастасия Гордеева көзге түсті.

Дегенмен Ербол Сарман баптайтын команда жағдайды екінші таймда түбегейлі өзгерте алды. 71-минутта Балсезім Тәліпбай есепті теңестірсе, Диана Ситникова дубль жасап (76’, 90+5’), матчқа нүкте қойды.

Жания Махаш – 6 нәтижелі әрекет

«Қайрат» «Ақтөбенің» төрт матчтан тұратын жеңісті сериясын еш қиындықсыз тоқтатты. Алматы футболшы қыздары қарсылас қақпасына жауапсыз сегіз гол соқты. Бұл голдардың алтауына Жания Махаш тікелей қатысты – оның еншісінде 3 гол мен 3 пас.

Одан бөлек, Ару Ермағамбетова мен Милена Николенко дубль авторлары атанса, Ангелина Клёнова да гол соқты.

«Тобыл» «Шахтерден» озып кетті

«Золушка» командасы турнир кестесінде соңғы орындардың біріне сырғыды – олар «Тобылдан» жеңілді. Қостанайлық команданың жеңісіне Амура Қарабаева (дубль), Алина Сартаева (1+1) және Асель Санат (бір гол) үлес қосты. Қонақтар сапында Валерия Друзь «абырой голын» соқты.

«Тобыл» соңғы бес матчта алғаш рет жеңіске жетіп, жүлдеге таласу мүмкіндігін сақтап қалды – үшінші орыннан бар болғаны екі ұпай артта.

«Астана» – тарихи рекорд

Астаналық команда «Жетісуды» 17:2 есебімен ойсырата ұтып, Freedom QJ League тарихындағы ең нәтижелі матчты өткізді.

Пента-трик жасап, үш голдық пас берген Асыл Пазыл енді тек қана бомбардирлік жарыста емес, жалпы «гол+пас» көрсеткіші бойынша да әйелдер лигасында ғана емес, бүкіл Freedom QJ League ішінде жеке-дара көш бастап тұр – оның еншісінде 28 нәтижелі әрекет (17 гол + 11 пас).