Сәтпаев пен Әмірдің голдары, Латурнустың дебюті: ҚПЛ-ның екінші турында юниорлар қалай өнер көрсетті

Сәтпаев «Ақтөбеге» гол соқты, Латурнус ҚПЛ-да дебют жасады

«Қайрат» өз алаңында «Ақтөбені» минималды есеппен жеңді. Кездесу тартысты өтті, мұндай ойындар принципиалды қарсыластар арасында жиі болады.

Матчтың тағдырын 17 жастағы Дастан Сәтпаев шешті. Freedom QJ League 2024 MVP-і алаңға 64-минутта шығып, 76-минутта жалғыз әрі жеңіс голын соқты. Айта кетерлігі, Дастан «Ақтөбеге» қарсы үшінші матч қатарынан жеңіс голын соғып отыр.

Бұл ойын тағы бір бұрынғы QJ League ойыншысы үшін маңызды болды – 17 жастағы «Ақтөбе» тәрбиеленушісі Виталий Латурнус ҚПЛ-да дебют жасады. QJL All Star мен мадридтік «Атлетико» арасындағы матчқа қатысқан ойыншы 86-минутта алаңға шығып, Никита Корзунды алмастырды.

Жасұлан Әмір «Жеңісті» жеңуге көмектесті

«Ордабасы» сырт алаңда елордалық «Жеңісті» 2:0 есебімен ұтты. Шымкенттік команданың жеңісінде 19 жастағы жартылай қорғаушы Жасұлан Әмір маңызды рөл атқарды.

QJ League-да 42 матч өткізген ойыншы алаңға тек екінші таймда шықты. Соған қарамастан, алдымен Сұлтанбек Астановқа нәтижелі пас беріп, кейін өзі де Максим Плотниковтың қақпасына гол соқты.

Айта кетейік, Әмірдің «Ордабасы» сапындағы матч саны – 17. Ал «Жеңіске» соққан бұл гол оның клубтағы алғашқы голы болды.

Алиакбар «Алтайдың» қақпасын қорғауды жалғастыруда

«Алтай» қақпашысы Абулхаир Алиакбар өткен турда ҚПЛ-да мәжбүрлі дебют жасаған еді, енді жарақат алған Иван Коноваловтың орнын алмастырып жүр. Бұл аптада оның командасы «Елімаймен» 1:1 есебімен тең ойнады.

Алиакбар «құрғақ» матч өткізбесе де, бес сейв жасады – 19 жастағы қақпашы үшін бұл жаман нәтиже емес.

Еске салайық, Абулхаир Freedom QJ League алғашқы маусымында «Қайсар» және «Жас Қыран» клубтарында ойнаған. Өткен маусымды Бірінші лигада өткізіп, «Алтайдың» жоғары дивизионға көтерілуіне үлес қосты.

Абраев – «Астананың» негізгі құрамында тағы да!

Өткен турда Максат Абраев ҚПЛ-да жарқын дебют жасаған еді. 18 жастағы «Астана» тәрбиеленушісі QJL Awards-та «Жыл перформансы» жүлдесін жеңіп алған болатын.

Бұл жолы «Астана» Қызылордада «Қайсармен» 0:0 есебімен тең түсті. Абраев қайтадан негізгі құрамда шығып, 85 минут ойнады, үш соққы жасап, 25 дәл пас берді.


Сонымен қатар, «Ертіс» пен «Атырау» матчында «Ақсу» сапында QJ League алғашқы маусымында ойнаған Тамерлан Агиманов алаңға шықты. «Жас Қыран» түлегі Жансұлтан Мұхаметханов «Оқжетпес» сапында «Каспийге» қарсы 74 минут өткізді.

Ал «Ұлытау» мен «Қызылжар» матчында қонақтар сапында бұрынғы «Қайрат» ойыншысы Глеб Валгушев алаңға ойын соңында шықты – өткен турда ол нәтижелі пас берген еді.