Саида Дюсембаева: «Шахтер» капитаны ретінде жаңа маусымда лайықты өнер көрсетуді көздеймін»

Жақында Саида Қазақстанның WU-17 құрамасында оқу-жаттығу жиынын өткізді. Бұл команда Еуропа чемпионатының іріктеу кезеңі аясында Молдова мен Черногория құрамаларымен кездеседі. Ойындар 4 және 7 сәуір күндері Даниловград қаласында өтеді.

Лиганың баспасөз қызметіне берген сұхбатында 15 жастағы жартылай қорғаушы өткен маусымнан алған негізгі әсері, жаңа маусымға дайындығы және ел намысын қорғаудың өзі үшін қаншалықты маңызды екені туралы айтып берді.

– Қысқы демалыс кезінде мен Freedom QJ League жаңа маусымына дайындалдым. Ал ұлттық құрамаға шақырту алғанымды білгеннен кейін жаттығуымды одан әрі күшейттім.

Ел намысын қорғау – үлкен мәртебе, және мен құраманың мүшесі болғаныма өте қуаныштымын. Кейде қобалжу болады, бірақ ол да уақыт өте шешіледі. Командадағы барлық қыздарды танимын, ұжымымыз маған өте ұнайды.

Шынымды айтсам, мен әлі шетелде болып көрген емеспін. Егер Черногорияға барсам, бұл мен үшін өте маңызды әрі толқынысқа толы сапар болмақ. Өз мүмкіндігімді көрсетуге тырысамын.

Ойын алдындағы ойларым қандай? Әдетте аздап қобалжу болады – қателіктерді азайтып, дәл пастарды көбейту, тактикаға сай әрекет ету және жақсы ойын көрсету туралы ойлаймын. Жалпы алғанда, көңіл-күйім жақсы.

Өткен маусымдағы ең маңызды сәт – қыздар лигасының ашылу ойыны, «Ертіс» командасына қарсы матч болды. Жеңіліс тапқанымыз өкінішті, бірақ сол ойынның айналасындағы қызығушылықтың арқасында ойнау өте әсерлі болды. Дегенмен, қобалжу да аз болған жоқ.

Биылғы жылға қойған мақсатым – футболға кәсіби тұрғыда бұрынғыдан да жауапкершілікпен қарау және оқуымды қатар алып жүру. Алда 11-сынып пен ҰБТ тұр.

Капитан ретінде команда мен бапкердің сенімін ақтап, лайықты өнер көрсеткім келеді. Жақсы сәттердің көп болғанын қалаймын, ең бастысы – денсаулық сыр бермесе екен.


Өткен маусымда Дюсембаева Freedom QJ League W турнирінде 14 матчта 8 гол соғып, 3 нәтижелі пас берді. Саида әсіресе Дамира Мақсатпен жақсы ойын байланысын қалыптастырды – ол бірнеше рет оның голдарына нәтижелі пас берген.