7 қарашада Алматыдағы Koktobe Hall-да QJL Awards рәсімі өтті. Бұл салтанатты кеш Қазақстанның жасөспірімдер арасындағы футбол чемпионаттары жүйесі – Freedom QJ League-тің төртінші маусымын қорытындылады.
Гала-кештің визуалды стилі QJ Gravity концепциясына негізделді. Ғарыш тақырыбы залдың безендірілуінен, декорациялардан және әлеуметтік желілердегі жарияланымдардан көрініс тапты. Кешті Евгений Ожогин мен Балауса Ерғалина жүргізді.
Қонақтарға Freedom Holding Corp. бас атқарушы директоры, Freedom QJ League Қамқоршылық кеңесінің төрағасы Тимур Турлов және Лига президенті Рохус Шох құттықтау сөз арнады.
«Чемпиондарымызды және маусымның барлық қатысушыларын құттықтаймын! Лиганы құрған кезде мен ол кәсіби футболға бастайтын баспалдақ болуы тиіс деген едім.
Бүгінде QJ League толыққанды спорттық экожүйеге айналды: биылғы маусымда оған 66 команда мен шамамен екі мың футболшы қатысып, 700-ге жуық матч өткізді.
Біз ақылды камераларды, бапкерлерге арналған цифрлық платформаны және жаттығу процесін талдау технологияларын енгіздік. Лиганың арқасында 350-ден астам жас футболшы кәсіби деңгейге шықты, араларында құрама ойыншылары да бар.
Алда – бесінші, мерейтойлық маусым. Біз Лиганы дамытуды және Қазақстан футболының болашағына инвестиция салуды міндетті түрде жалғастырамыз», – деді Тимур Турлов құттықтау сөзінде.
«Жас футболшылар үшін мұндай кештердің маңызы ерекше: бүгін осында үздіктердің қатарынан орын алған әрбір номинант – қазірдің өзінде жеңімпаз.
Сыйлықтарымызға есімдері берілген ардагерлерді ұмытпаудың да маңызы зор – қазақстандық футболшылардың талай буыны солардан үлгі алып өсті.
Серіктестерімізге және Тимур Русланович Турловтың өзіне қолдауы үшін, жемісін бере бастаған жобамызға сенгені үшін алғыс айтамын. Әрі Лиганы өзіміздің қазақстандық мамандар жасап отырғанын мақтан тұтамын», – деп атап өтті Рохус Шох.
Сыйлық иегерлері және маусымның символдық құрамасы
Лига дәстүрлі жыл сайынғы номинациялар бойынша жеңімпаздарды жариялады.
QJL Awards рәсімінде табысталатын сыйлықтардың барлығы дерлік Қазақстан футболында із қалдырған тұлғалардың есімімен аталады – кешегі аңыздардан бүгінгі жұлдыздарға дейін.
Бақтиер Зайнутдинов атындағы Changan MVP of the Season сыйлығы: Дәулет Орынбасар («Қайрат»).
Эдуард Сон атындағы сыйлық – үздік шабуылшы: Әділбек Тұрдах («Ордабасы»).
Евгений Яровенко атындағы сыйлық – үздік қорғаушы: Алихан Әбді («Қайрат»).
Антон Шох атындағы сыйлық – үздік жартылай қорғаушы: Расул Акимов («Шахтер»).
Александр Убыкин атындағы сыйлық – үздік қақпашы: Даниил Нуржанов («Тобыл»).
Евстафий Пехлеваниди атындағы сыйлық – үздік бомбардир: Дәулет Орынбасар («Қайрат»).
Freedom Video ұсынатын «Жыл перформансы» сыйлығы: Камиль Гайнуллин («Қайрат»).
Георгий Хутиди атындағы сыйлық – үздік бапкер: Игорь Бугаев («Тобыл» U-15).
Асхат Тағыберген атындағы сыйлық – маусымның үздік голы: Ануар Төленді (КФФ академиясы).
Игорь Шацкий атындағы сыйлық – үздік сейв: Нұрсұлтан Солтанғазы («Каспий» U-17).
Александр Кулаков атындағы сыйлық – үздік төреші: Нұрдәулет Қожамұратов (Тараз).
Үздік инспектор: Василий Юрченко (Ақтөбе).
Диас Омаров атындағы сыйлық – үздік медиа-қызмет: «Шахтер».
Сейілдә Байшақов атындағы сыйлық – үздік маркетинг: «Шахтер».
Евгений Ротт атындағы сыйлық – үздік басшы: Зауржан Балтиев («Жас Қыран»).
Үздік менеджер: Қайырбай Хасенов («Ертіс»).
Үздік дәрігер: Еламан Саурбаев («Ертіс»).
Үздік психолог: Динара Исаева («Астана»).
Бақтиер Зайнутдинов атындағы сыйлықтың иегері Дәулет Орынбасар шетелдік клубта тағылымдамадан өте алады. Мұндай мүмкіндікті Лига ойыншыларын халықаралық деңгейде дамыту бағдарламасы аясында «Астана Моторс» компаниясының құрамына кіретін Changan брендінің Қазақстандағы ресми дистрибьюторы ұсынып отыр.
Мәселен, өткен маусымдағы Changan MVP иегері, «Шахтердің» тәрбиеленушісі Глеб Макридов Мадридтегі «Атлетико» базасында бір апталық оқу-жаттығу жиынынан өтті.
Позициялар бойынша үздік ойыншылар мен MVP – Даниил Нуржанов, Алихан Әбді, Расул Акимов, Әділбек Тұрдах және Дәулет Орынбасар – Freedom Bank-тен 200 000 теңгелік сертификат алды.
Сондай-ақ рәсімде маусымның символдық құрамасы таныстырылды:
Қақпашы: Даниил Нуржанов («Тобыл»).
Қорғаушылар: Руслан Джетенов («Тобыл»), Алихан Әбді («Қайрат»), Мейірлан Балтабаев («Шахтер»).
Жартылай қорғаушылар: Мансұр Авасханов («Қайрат»), Ибраһим Бауыржанов («Ақтөбе»), Расул Акимов («Шахтер»), Жәнібек Жайлаубек («Шахтер»).
Шабуылшылар: Әділбек Тұрдах («Ордабасы»), Аян Аманжұлов («Ақтөбе»), Дәулет Орынбасар («Қайрат»).
PUMA STELLAR Pro – Freedom QJ League 2027 ресми добы
Рәсімде Лиганың жаңа ресми добының тұсаукесері өтті. Өткен маусымда матчтар adidas Tiro Pro добымен ойналса, 2027 жылы Лига турнирлерінде PUMA компаниясының доптары қолданылады – Freedom QJ League-тің арнайы брендингімен.
STELLAR Pro QJ League үлгісінің ресми футбол жарыстарының талаптарына сай екенін растайтын FIFA Quality Pro сертификаты бар.
Маусым басталар алдында әр қатысушы команда Лигадан ойындар мен жаттығуларға арналған ондаған доп алады.
Қайырымдылық аукционы
Кеш бағдарламасында дәстүрлі қайырымдылық аукционы да өтті.
Саудаға «Манчестер Сити» шабуылшысы Эрлинг Холандтың өз қолтаңбасы қойылған футболкасы шығарылды – оны Лиганың серіктесі Mastercard компаниясы ұсынды.
Бұл лоттың символдық мәні ерекше болды – қазан айында Freedom QJ League City Football Group-пен стратегиялық ынтымақтастық орнатқанын жариялаған еді.
Аукционда кәсіпкер, «Жас Қыран» балалар мен жасөспірімдер футбол орталығының басшысы Берік Қаниев жеңіске жетті – ол лотқа 3 000 000 теңге ұсынды. Әдеттегідей, түскен қаражат қайырымдылыққа жұмсалады.
Шарықтау шегі: чемпиондар салтанаты
Кештің басты командалық оқиғасы «Қайрат» U-18 командасын құрметтеу болды – Koktobe Hall сахнасында жігіттер чемпиондық трофейді көкке көтерді. Алматылықтар Freedom QJ League кубогын қатарынан төртінші рет жеңіп алды.
2026 жылғы маусымда «сары-қаралар» мәреге үш тур қалғанда чемпиондық атақты қамтамасыз етіп, жинаған ұпай саны бойынша өз рекордын (62) қайталады және қатарынан үшінші маусымды бірде-бір жеңіліссіз өткізді.
Енді «Қайрат» УЕФА Жастар лигасының 2027/28 маусымында Ұлттық чемпиондар жолы аясында Қазақстан намысын тағы да қорғайды.
QJL Awards рәсімі Freedom Video онлайн-кинотеатрында тікелей көрсетілді. Рәсімнің толық жазбасын да сол жерден көруге болады.
Freedom QJ League жобасын 2023 жылы Тимур Турлов пен Рохус Шох құрған. Лига Қазақстан футбол федерациясының қолдауымен өткізіледі.
Лиганың барлық шығындары бас серіктес – Freedom Holding Corp. компаниясының жеке қаражаты есебінен толық қаржыландырылады.
Лига алғаш рет жасөспірімдер футболында кәсіби чемпионаттарға барынша жақын жағдай қалыптастырды. Жарыстар апта сайынғы цикл бойынша, командалардың өз алаңында және сырт алаңда ойнауын көздейтін айналмалы жүйемен өткізіледі.
