Freedom QJ League маусымының үздік голы үшін табысталатын Асхат Тағыберген атындағы сыйлықтың иегері белгілі болды.
2026 жылғы маусым қорытындысы бойынша бұл марапат КФФ академиясының ойыншысы Ануар Төлендіге бұйырды. Ол сыйлықты жыл сайынғы QJL Awards марапаттау рәсімінде алды.
Маусымның үздік голы деп Ануардың 7-турда соққан добы танылды: «Таразға» қарсы сырт алаңдағы матчтың 8-минутында ол КФФ академиясын алға шығарды. Кездесу 1:1 есебімен тең аяқталып, «Тараз» маусымда алғаш рет өз алаңында жеңіске жете алмады.
Ануар 2010 жылы дүниеге келген, яғни флагмандық турнирдің негізгі жас санатынан бір жас кіші. Сонымен қатар ол 5-турда «Қайраттың» қақпасына осы маусымдағы алғашқы голды соққан ойыншы атанды.
Еске сала кетейік, 2023 жылы Асхат Тағыберген атындағы сыйлықты Ахметәлі Қалтанов («Астана»), 2024 жылы Ахан Серік («Ордабасы»), ал былтыр марапаттың алғашқы әйел иегері атанған Аружан Оспанова («Ертіс») жеңіп алған.
