«Шахтер» мен «Ертістің» мәселелері, алматылықтар жеңісті жалғастыруда: Freedom QJ League-тің 14-туры туралы не білу керек

Екі астананың дербиіндегі ойсырата жеңіс

«Астана» «Қайраттың» кезекті жеңісіне тосқауыл қоя алмады. «Сары-қаралар» Футбол үйінде бес жауапсыз доп соқты, оның әрқайсысын әртүрлі ойыншы енгізді. Гол авторлары: Аламгир Смаков, Абылай Төлеухан, Дәулет Орынбасар, Амирбек Базарбаев және Қайсар Малаев.

Төлеухан бұл ойында 1+1 көрсеткішімен көзге түсті – ол турнирдегі «гол+пас» жүйесі бойынша үздік ойыншылар тізімінде көш бастап келеді.

Ербол Мұсабаев командасы қазір турнир кестесінде бесінші орында, қола жүлдеден алты ұпайға қалып келеді. Дегенмен, астаналықтарға бір жағынан жолы болды – үшінші және төртінші орында тұрған «Шахтер» мен «Ертіс» те бұл турда ұпай жоғалтты. Алда әлі сегіз тур бар.

«Мұнайшылар» Шымкентте ұтылды

«Ордабасы» өз алаңында «Атырауды» минималды есеппен жеңді. Тимур Рахимов есепті 10-минутта ашты, ал 53-минутта Абдулмансур Хасан таразы басын теңестірді. Алайда көп ұзамай Талант Қуаныш жеңіс голын соқты. 2:1 есебі матч соңына дейін сақталды.

Осылайша, шымкенттіктер турнир кестесінің жоғарғы жартысын 19 ұпаймен түйіндеп тұр. «Атыраудың» еншісінде 13 ұпай және 9-орын.

Қарағандыдағы тең ойын

«Тараз» жүлде үшін басты үміткерлердің бірі – «Шахтерден» ұпай тартып алды. «Кеншілер» 10-минутта Азизжон Бердиевтен жылдам гол өткізіп алды, ал есепті тек 55-минутта Глеб Макридов пенальтиден теңестірді. Қалған уақытта ешбір команда нәтижені өзгерте алмады, матч тең аяқталды.

«Шахтер» турнир кестесінде үшінші орынға түсіп қалды, алматылық «Жас Қыранның» бір ұпайлық басымдығы және бір ойыны қорда тұр.

Кеншілер үшін тағы бір жағымсыз жаңалық – нәтижелі жартылай қорғаушы Найман Сатенов алғашқы он минутта жарақат алып, алмастырылды.

«Жас Қыранға» қиындық тумады

Алғашқы айналымда «Қайсар» «Жас Қыраннан» ұпай тартып алған еді, алайда Алматыда бұл жетістікті қайталау немесе асып түсу мүмкін болмады – алаң иелері 4:1 есебімен сенімді жеңіске жетті. Гол авторлары: Арлан Жанғазы, Жанғирхан Жанкуразов, Мансур Қартамысов және Данил Николаев. Ал «қасқырлар» сапынан тек Жанболат Әзімхан көзге түсті.

Бұл матчтан кейін «Қайсардың» төрт тең ойыннан тұратын ерекше сериясы үзілді, ал «Жас Қыран» жүлделі үштік позициясын одан әрі бекітті.

Төлеубек «Ертісті» жеңілістен құтқарды

Ал «Каспий» өз кезегінде тең ойындар сериясын жалғастырып, Павлодардан бір ұпаймен кетті және жеңіске жетуге де жақын болды.

50-минутта «Ертіс» пенальти мүмкіндігін алып, есеп ашты – Руслан Рахметов өз мүмкіндігін сәтті орындады. Дегенмен, алаң иелерінің ойыннан гол соғуы мүмкін болмады – ал қонақтар сапынан Шахмардан Демесін мен Нұрғазы Құсаин бұрыштамадан нәтижелі болды.

Одан кейін ақтаулықтар тіпті алға шығуға жақын еді – бірақ Мадияр Төлеубек Ануар Узақбайдың 11 метрлік соққысын қайтарды.

Ал U16 турнирінде павлодарлықтар «Каспийді» 6:1 есебімен жеңіп, бес голға Артем Лящук үлес қосты – ол хет-трик жасап, екі нәтижелі пас берді.

Еске сала кетейік, «Тобыл» мен «Ақтөбенің» 14-тур аясындағы барлық үш кездесуі 7 қыркүйекке ауыстырылған.