Көктем жақындап келеді – демек, Қазақстан футбол маусымының басталуына да аз уақыт қалды. Бұған дейін Freedom QJ League жарысында өнер көрсеткен көптеген қазақстандық жас ойыншылар ақпан айында ересектер командалары сапында белсенді ойнап, тіпті кейбірі гол соғып үлгерді.
«Қайсар»
Қызылордалықтар оқу-жаттығу жиынын ірі жеңіспен аяқтады – жолдастық кездесуде даниялық «ФА 2000» клубын 3:0 есебімен жеңді.
Үш голдың екеуін Freedom QJ League бұрынғы ойыншылары соқты. «Қасқырлар» тәрбиеленушісі Темірлан Мұрзағалиев бұрыштамадан берілген пастан кейін баспен есеп ашты. Ал «Ақсу» клубының экс-ойыншысы Әлімжан Еркін айып алаңының сыртынан үшінші голды соқты. Екі голдың арасында 32 жастағы нигериялық Имо Эзекиль де мергендік танытты.
«Ордабасы»
Шымкенттік команда қырғызстандық «Мурас Юнайтедті» 4:0 есебімен жеңді. Голдардың бірін Freedom QJ League 2024 маусымының үздік сұрмергені, 19 жастағы Бағдаулет Нұралы соқты.
Өткен маусымда Нұралы «Ордабасының» ҚПЛ-дегі матчтарына бірнеше рет қатысып, көбіне қосалқы құрамнан шыққан еді. Биыл оның рөлі ересектер құрамында айтарлықтай артуы мүмкін.
«Ертіс»
Павлодарлық команда ақпандағы жолдастық матчтардың бірінде «Ленинградецпен» 1:1 есебімен тең түсті. «Ертіс» сапындағы жалғыз голдың авторы – Лиганың алғашқы маусымына қатысқан Тамерлан Агиманов.
Агиманов Бірінші лигада 22 матчта 8 гол соғып, команданың күміс жүлде алуына елеулі үлес қосты. Енді ол ҚПЛ-ге қайта оралып отыр.
«Астана»
Өткен маусымның вице-чемпиондары БАӘ-де оқу-жаттығу жиынын өткізіп, жолдастық кездесуде жергілікті «Арабиан Фэлконсты» 3:2 есебімен жеңді. Бұл ойында Марин Томасов пен Рамазан Кәрімовпен қатар 18 жастағы Арсен Ахметов ересектер құрамында алғаш рет гол соқты.
2024 жылы Ахметов Freedom QJ League негізгі турнирінде 21 матчта 4 гол және 4 нәтижелі паспен көзге түскен.
«Атырау»
«Атырау» командаларының бірі Мәскеудің «Локомотив» U-19 ұжымына 1:4 есебімен жеңілді. Дегенмен 43-минутта бұрын Лигада ойнаған 20 жастағы Темірлан Жиеналиев гол соқты.
Жиеналиев Freedom QJ League-тің алғашқы маусымында 12 матчқа қатысып, 4 гол авторы атанған.
«Тобыл»
Ай басында қостанайлықтар оқу-жаттығу жиынында Батуми қаласының «Динамосын» 1:0 есебімен жеңді. Жеңіс голын 18 жастағы шабуылшы Евгений Коняшкин соқты.
Коняшкин 2024 жылы Freedom QJ League-да «Тобыл» сапында 7 гол соғып, 1 нәтижелі пас берген. Сондай-ақ ол Лиганың қайырымдылық бастамасына қатысып, балалар үйінің тәрбиеленушілеріне шеберлік сабағын өткізген.
«Қайрат»
Қазақстанның қазіргі чемпионы да бірнеше жолдастық матч өткізді. Соның ішінде «Пари НН»-мен өткен ойын ерекше болды – алматылықтар 3:4 есебімен жеңілді.
Бұл кездесуде 18 жастағы Мансұр Бірқұрманов екі гол соқты. Ол Freedom QJ League 2024 маусымында 15 матчта 9 гол және 4 нәтижелі паспен команданың маңызды ойыншыларының бірі болды. Сондай-ақ ол турнирдің екі дүркін чемпионы атанды.
Мансур жас болса да, УЕФА Чемпиондар лигасында дебют жасап үлгерді. Аталған матчта Мұхамедәлі Әбіш те алаңға шыққан.
«Шахтер»
Қарағандылық клубтың маусымалды матчтарында Лигада ойнаған екі футболшы гол соқты.
Алдымен 19 жастағы жартылай қорғаушы Роман Асылбаев мергендік танытты. Freedom QJ League 2024 маусымының үздік жартылай қорғаушысы «Коканд 1912» қақпасына гол соқты.
Екі аптадан кейін Глеб Макридов та көзге түсті. Changan MVP of the Season жүлдесінің иегері ресейлік «Балтика» дубль командасымен ойында алаңға қосалқы құрамнан шығып, гол соқты.
Наурыз айында Макридов мадридтік «Атлетико» клубына барып, халықаралық даму бағдарламасы аясында бір апталық жиыннан өтеді.
.webp)
(0).webp){kind=logo}
.webp)
.webp){kind=logo}
