ҚФФ Төрешілер комитетінің шешімімен Freedom QJ League матчтарындағы төрешіліктің сапасын арттыру және дамыту мәселелерін үйлестіретін арнайы кіші комитет құрылды.
Кіші комитеттің негізгі міндеттеріне Freedom QJ League матчтарындағы төрешілікті дамыту, лига ойындарына қызмет көрсететін төрешілерді оқыту, сондай-ақ Freedom QJ League төрешілері арасынан Екінші лигаға ілгерілету үшін үміткерлерді іріктеу кіреді. Сонымен қатар, өңірлік төрешілер комитеттері ұсынған төрешілерді Freedom QJ League матчтарына тағайындау үшін іріктеу жұмыстары жүргізіледі.
Апта сайын матчтар мен ойын эпизодтарын талдау жұмыстарына ерекше назар аударылып, нұсқаушылар тарапынан тиісті ұсыныстар беріледі. Сондай-ақ ұлттық деңгейдегі төрешілерге қойылатын талаптар түсіндіріліп, көрсетіледі. Кіші комитет инспекторлармен жұмыс жасап, өңірлік төрешілер комитеттерімен тығыз байланыс орнатады.
Freedom QJ League төрешілігін дамыту жөніндегі кіші комитетті Фуркат Атажанов басқарады. Ол – бұған дейін FIFA және UEFA дәрежесіндегі төреші болған, УЕФА Чемпиондар лигасы мен Еуропа лигасы матчтарына қызмет көрсеткен тәжірибелі маман.
Кіші комитет құрамына Премьер-лиганың қазіргі инспекторы Асхат Абданбаев та енеді. Ол 2026 жылдан бастап ұлттық деңгейдегі техникалық нұсқаушы мәртебесінде жұмыс істейді.
Кіші комитеттің құрылуы Freedom QJ League төрешілер корпусын даярлау мен дамытудың жүйелі моделін қалыптастыруға, сондай-ақ жасөспірімдер және жастар деңгейіндегі төрешілік сапасын арттыруға бағытталған.
.webp)
(0).webp){kind=logo}
.webp)
.webp){kind=logo}
