Қазақстан U-17 құрамасы Даму Кубогында Тәжікстанды жеңді

Бауыржан Сағындық баптайтын команда Тәжікстан құрамасын 3:1 есебімен жеңді. Қазақстан құрамасы сапында голдарды Ануар Төленді, Ислам Рақым және Роман Черноморец соқты.

«Ойын қиын өтті, жігіттерге сергектік жетіспеді. Құрамда ротация жасадық, кей сәттерде өзара түсіністік аз болды. Жалпы алғанда, балалар жақсы ойнады, соңына дейін шыдады, ойынға көңілім толады. Үшінші матч, кеше кешке ойнадық, дайындық пен қалпына келуге уақыт аз болды. Енді демалып, талдау жасауға мүмкіндік бар», – деді Бауыржан Сағындық.

Бұған дейін Қазақстан құрамасы Минск құрамасын жеңіп, Беларусь U-17 командасына есе жіберген еді. Дүйсенбі күні команда үшінші орын үшін матч өткізеді.

Айта кетейік, құраманың тізіміне енген футболшылардың басым бөлігі Freedom QJ League жарыстарында өнер көрсеткен. Қаңтар айында команданың аға бапкері Бауыржан Сағындық Лиганың спорттық-сараптамалық бөлімнің жетекшісі болып тағайындалды. Бұған дейін ол сарапшы қызметін атқарған.