А лигасының он бесінші туры мәресіне жетті. Басты турнирдің қорытындысын шығарамыз.
Бұл уикендтің басты ерекшелігі – алаң иелерінің толық басымдығы. Турды өз алаңында өткізген алты команданың ешқайсысы жеңілген жоқ: бес жеңіс және бір тең ойын.
«Қайрат» жеңді – бірақ небәрі екі гол соқты
Тимур Сегізбаев атындағы стадионда өткен матчта ұзақ уақыт бойы есеп ашылмады – командалар үзіліске 0:0 есебімен кетті. Алайда екінші таймда алаң иелері «Тобыл» қақпасының кілтін тапты: 66-минутта Сұлтанәлі Абдуәли есеп ашса, қосымша уақытта Роман Черноморец нүкте қойды – 2:0.
Бұл – «Қайраттың» 15 матчтағы 15-жеңісі: 65 гол соғып, небәрі 5 доп жіберген. Енді арифметика да «сары-қаралардың» пайдасына жұмыс істеп тұр – алматылық команда мерзімінен бұрын чемпион атануға жақындап келеді.
Ал «Тобыл» 19 ұпаймен жетінші орында келеді. Дегенмен төртінші орынға дейін небәрі екі ұпай бар.
«Шахтердің» құрғақ жеңісі
Қарағандылықтар «Ақтөбені» 3:0 есебімен жеңді. Бірінші гол курьезді жағдайда соғылды: 7-минутта қонақтардың жартылай қорғаушысы Әлімжан Тәженов өз қақпасына гол соғып алды. Үзілістен кейін «кеншілер» жеңімпазға қатысты барлық сұрақты шешті – Айбатолла Шулаков (62-минут) пен Александр Яковлев (68-минут) мергендік танытты.
34 ұпай жинаған «Шахтер» көшбасшының жалғыз нақты қуғыншысы болып қалып отыр. Қарағандылықтардың қорғанысы әлі де турнирдегі екінші үздік көрсеткішке ие – 15 турда 8 гол жіберген.
«Ақтөбе» қатарынан екінші рет жеңілсе де, турнир кестесіндегі алтыншы орнын сақтап қалды.
Жұбанов «Қайсарды» құтқара алмады
Шымкентте жанкүйерлер алты гол көрді. «Ордабасы» 15-минуттың өзінде 2:0 есебімен алға шықты – Дияр Рахимжанов пен Әділбек Тұрдах гол соқты. Бірақ бірінші таймның соңында «Қайсар» күтпеген жерден ойынға қайта оралды: алдымен Абылай Жұбанов Мәди Жеңісұлына нәтижелі пас берді, кейін өзі де қарсылас қақпасын дәл көздеді. Командалар үзіліске тең есеппен кетті.
Екінші таймда алаң иелері бәрібір өз дегеніне жетті. 70-минутта алаңға шыққан Дилшод Назимбеков үш минуттан кейін гол соқты, ал 88-минутта Тұрдах дубль авторы атанды – 4:2.
Әділбек жеке көрсеткішін 11 гол және 5 нәтижелі пасқа жеткізді. «Гол+пас» жүйесі бойынша 16 ұпай – лигадағы төртінші нәтиже. Шымкенттіктер 29 ұпаймен үшінші орынды сенімді ұстап тұр, ал «Қайсар» (12 ұпай, 11-орын) төрт матч қатарынан жеңіске жете алмай жүр және «Ертіспен» бірге турнирдегі ең нашар қорғаныс көрсеткішіне ие – әрқайсысы 44 голдан жіберген.
Павлодарда екі пенальти де соғылмады
Турдағы жалғыз тең ойын Павлодарда тіркелді – 1:1.
Есеп мүлде басқаша болуы мүмкін еді: бірінші таймның өзінде командалар бір-бір пенальтиден орындады, бірақ екі жағдайда да қақпашылар жеңімпаз шықты. 37-минутта Әмір Жангожин Қалқаман Төлегеннің соққысын қайтарса, 44-минутта Төрежан Мырзатай Тамерлан Шоқановтың пенальтиін тойтарды. Айта кетейік, «Ертіс» қақпашысы үшін бұл биылғы маусымдағы алғашқы матч болды.
Голдар үзілістен кейін соғылды: 67-минутта Ярослав Колесник алаң иелерін алға шығарды, ал 85-минутта Надер Мовафи Махмуд қорытынды есепті орнатты.
«Ертіс» 9 ұпаймен соңғы орында қалып отыр. Ал «Жас Қыран» (21 ұпай) төртінші орнын сақтап қалғанымен, «Ордабасыдан» сегіз ұпайға қалып қойды – алматылықтардың жүлдеге таласу мүмкіндігі азайып барады.
«Тараз» қатарынан үшінші матчта жеңіске жетті
Таразда алаң иелері іске бірден кірісті: 2-минутта қорғаушы Ғалымжан Оразалиев «Астананың» қақпасына гол соқты.
Елорда командасы үзілістен кейін жауап берді – 48-минутта Амандық Хамидуллин пенальтиді сәтті орындады. Бірақ қонақтардың қуанышы небәрі бес минутқа созылды: 53-минутта үзілістен кейін алаңға шыққан Ернұр Орынбасар «Таразға» жеңіс сыйлады.
Оңтүстік командасы қатарынан үшінші рет жеңіп, 18 ұпаймен сегізінші орында келеді. Ал «Астана» соңғы бес турда небәрі бір ұпай жинады – 15 ұпай, тоғызыншы орын және 36 жіберілген гол.
«Каспий» аз құрамда жеңіске жетті
Ақтауда алаң иелері КФФ Академиясына қарсы матчта үш ұпай алды – 2:1. 14-минутта есепті Рамазан Амангелдиев ашты. Қонақтар Сұлтан Дәуреновтің голының арқасында таразы басын теңестірді (28-минут), бірақ 76-минутта «Каспий» капитаны, қорғаушы Шахмардан Демесін жеңіс голын соқты.
Матч соңын «Каспий» он ойыншымен өткізді: 89-минутта Ерсін Орантаев тікелей қызыл қағаз алды. Соған қарамастан, алаң иелері басымдығын сақтап қалды.
Енді Руслан Бесенғалиевтің командасы 13 ұпаймен «Астанаға» жақындады, ал КФФ Академиясы (20 ұпай) бесінші орында қалды.
15-турдан кейінгі үздік сұрмерген: Дәулет Орынбасар («Қайрат», 17 гол).
15-турдан кейінгі үздік ассистент: Аян Аманжұлов («Ақтөбе», 7 нәтижелі пас).
