Қыздар турнирінің өткен матчтарындағы басты оқиғалармен бөлісеміз.
«Қайрат» турнир кестесінде бірінші орынға шықты
Тимур Сегізбаев атындағы стадионда өткен турдың орталық матчы ірі есеппен аяқталды – «Қайрат» «Астананы» 5:0 есебімен жеңді.
18-минутта алаң иелерінің қорғаушысы София Яшкова пенальтиден есеп ашса, үзіліске дейін Жания Махаш басымдықты еселей түсті. Екінші таймда «сары-қаралар» тағы үш гол соқты: София Ягудина бір рет мергендік танытса, Милена Николенко дубль авторы атанды.
Бұл нәтиже чемпиондық бәсекеге тікелей әсер етті. Осы турға дейін турнир кестесін қарсыласынан бір ұпай алда тұрған «Астана» бастап келген еді. Енді «Қайраттың» еншісінде 27 ұпай, ал елордалық командада – 25.
Сонымен қатар қазіргі чемпиондар маусымдағы жалғыз жеңілісі үшін қарымта қайтарды. Еске салайық, 3-турда олар сырт алаңда «Астанаға» 0:2 есебімен есе жіберген болатын. Ал елордалық команда үшін бұл маусымдағы алғашқы жеңіліс болды – Алматыға сапарға дейін олардың еншісінде сегіз жеңіс пен бір тең ойын бар еді.
«Тобыл» Павлодардан үш ұпаймен қайтты
Қостанайлық команда сырт алаңда «Ертісті» 5:1 есебімен жеңді, дегенмен бірінші таймнан кейін есеп тең болатын.
16-минутта Ясмина Мантулина қонақтарды алға шығарды, алайда үзіліске дейін Мөлдір Амангелді таразы басын теңестірді.
Барлығы екінші таймда шешілді: Амура Карабаева дубль жасап, Алина Сартаева мен Калима Бесембай бір-бір голдан соғып, алаң иелеріне мүмкіндік қалдырмады.
Енді 14 ұпай жинаған «Тобыл» қосымша көрсеткіштер бойынша «Ақтөбеден» кейін төртінші орында тұр, ал «Ертіс» (7 ұпай) жетінші сатыда қалды. Айта кетейік, бірінші айналымдағы өзара кездесуде де қостанайлық футболшылар жеңіске жеткен еді, бірақ ол жолы ойын әлдеқайда тартысты өтті – 3:2.
Қызылордада жауапсыз сегіз гол
Турдағы ең ірі есеп Ғани Мұратбаев атындағы стадионда тіркелді. Мұнда «Ақтөбе» «Қайсарды» 8:0 есебімен ойсырата жеңді.
Матч тағдыры алғашқы 22 минуттың өзінде шешілді: осы аралықта қонақтар Алия Самат, Айжан Есіркепова және Даяна Төлебаеваның голдарының арқасында үш рет мергендік танытты.
Есіркепова мен Төлебаева матч қорытындысында дубль авторы атанса, Алуа Қалиева, Малика Асқарова және Інжу Болатова бір-бір голдан соқты.
«Қызыл-ақтар» үшінші орында келеді, бірақ турнир кестесіндегі бәсеке өте тығыз – «Тобыл» мен «Шахтерде» де 14 ұпайдан бар. Ал «Қайсар» қатарынан сегізінші рет жеңілді: қызылордалықтардың еншісінде үш ұпай, ал доп айырмасы – 6:47.
«Шахтер» жеңісті сақтап қалды
Қарағандыда «Шахтер» «Ордабасыны» 4:2 есебімен жеңді. Алаң иелері үзіліске дейін үш доп басымдығына ие болды – Дария Тулегенова, Анастасия Зеленина және Сабина Крышкина мергендік танытты. 63-минутта Амина Аужанова есепті 4:0-ге жеткізді.
Қонақтар матч соңында жауап бере алды: Балсезім Талипбай алты минут ішінде екі рет гол соқты, алайда оңтүстік командасының одан әрі есепті қысқартуға шамасы жетпеді. Еске салайық, бірінші айналымдағы бұл командалардың кездесуі нәтижелі тең есеппен аяқталған еді – 3:3.
Енді «Шахтердің» 14 ұпайы және бесінші орны бар, команда қола жүлде үшін күресте жақсы мүмкіндік сақтап отыр. «Ордабасы» 10 ұпаймен алтыншы сатыда келеді.
Алда не бар?
Чемпионаттың аяқталуына төрт тур қалды. Алтын және күміс жүлде үшін күрес іс жүзінде «Қайрат» пен «Астана» арасындағы тартысқа айналды – олар ең жақын қуғыншыларын он ұпайдан астам айырмамен артта қалдырды.
Ал қола үшін бәсеке өте тартысты болмақ: «Ақтөбе», «Тобыл» және «Шахтер» 11-тур қарсаңында бірдей 14 ұпайдан жинаған, ал «Ордабасы» бұл топтан небәрі төрт ұпайға қалып келеді.
10-турдан кейінгі үздік сұрмерген: Милена Николенко («Қайрат», 17 гол).
10-турдан кейінгі үздік ассистент: Жания Махаш («Қайрат», 11 нәтижелі пас).
