Freedom Video ұсынатын «Жыл перформансы» арнайы сыйлығының иегері белгілі болды. Бұл марапат жыл бойы қазақстандық көрермендерге ең жарқын эмоциялар сыйлаған футболшыға табысталады.
2026 жылғы маусым қорытындысы бойынша бұл марапат «Қайрат» қақпашысы Камиль Гайнуллинге бұйырды. Ол сыйлықты жыл сайынғы QJL Awards марапаттау рәсімінде алды.
Камиль үшін жылдың ең басты сәті үш мыңнан астам көрермен жиналған QJL All Star мен Мёнхенгладбахтың «Боруссия» академиясы арасындағы матч болды. Гайнуллин Лиганың үздік ойыншыларынан құралған құраманы алаңға капитан ретінде бастап шықты. Оның сенімді ойынының арқасында даңқты неміс қарсыласы негізгі уақытта гол соға алмады – 0:0. Ал пенальти сериясында QJL All Star алғашқы соққысын жүзеге асыра алмаған кезде, Камиль қарсыластың соққысын қайтарып, командасын ойынға қайта қосты. Нәтижесінде Лига құрамасы пенальти сериясында 6:5 есебімен жеңіске жетті.
2026 жылғы маусымда Камиль «Қайрат» сапында флагмандық турнирде 13 матч өткізді: оның алтауында қақпасына гол жібермеді, ал жалпы небәрі 4 доп өткізді. Бұл чемпиондық атақ ол үшін қатарынан үшінші болды – 2024 және 2025 жылдары Гайнуллин «Қайратпен» бірге U-17 турнирінде жеңіске жеткен еді.
Еске сала кетейік, былтыр «Жыл перформансы» сыйлығын бір жылдың ішінде Лиганың кибертурнирінде жеңіске жетіп, QJL All Star матчында мадридтік «Атлетиконың» қақпасына гол соққан Мақсат Абраев («Астана») иеленген.
