Тартысқа толы уик-энд: Freedom QJ League-тің 13-турына шолу

«Тараз» – «Астана»: оңай болмайтын матч

Соңғы уақытта екі команда да жақсы формада емес. Оңтүстіктегілер соңғы төрт матчтың үшеуінде жеңілді, ал «Астана» бес тур қатарынан жеңіске жете алмай жүр.

Айта кетейік, астаналықтардың негізгі ойыншылары Ален Пак пен Максат Абраев алдағы матчта алаңға шығуы мүмкін — олар бұған дейін ересектер командасына шақыртылып, бірнеше ойынды жіберіп алған болатын.

«Актөбе» – «Шахтер»: қарымта ойын

Кестеде екінші орында тұрған қарағандылықтар Актөбеге қиын қонаққа барады. Өткен турда «Шахтер» «Астанамен» 2:2 есебімен тең түсті.

Бірінші айналымда «Шахтер» Габунов командасын жеңген еді. Сондықтан бұл жолы актөбеліктер қарымта қайтаруға бар күшін салатыны анық.

«Атырау» – «Тобыл»: кім басым түседі?

Костанайлықтар «Атыраудан» үш ұпайға қалып келе жатқанына қарамастан, олардың бір ойыны кем – «Жас Қыранмен» кездесу тамызға шегерілген.

Сәйкесінше, бұл матч кестенің төменгі жағындағы тікелей бәсекелестердің ойыны болмақ. Бірінші айналымда «Атырау» соңғы минутта жеңісті жұлып алған еді – бұл жолы да тартыс болары сөзсіз.

«Қайсар» – «Каспий»: аутсайдерлер текетіресі

Тағы бір қызыққа толы ойын. «Қасқырлар» соңғы үш ойында «Тараз», «Тобыл» және «Ордабасыдан» ұпай алып, тең түсті.

Ал ақтаулық жастар өткен турда маусымның басты сенсацияларының біріне қол жеткізіп, «Қайраттан» ұпай жұлып алды. Бұл жолы да сол қарқын сақтала ма?

«Жас Қыран» – «Ордабасы»: Есеналиев қалай ойнайды?

Алматылықтар әлі жеңіліп көрмеген. Бірақ бұл жолы қарсылас – қарқын алып келе жатқан «Ордабасы».

Соңғы матчтарда «Жас Қыранның» шабуылы баяу. Ал шымкенттік шабуылшы Жанали Есеналиев соңғы екі ойында үш гол соқты. Ол Алматыда да гол соқса, алаң иелеріне оңай соқпайды.

«Қайрат» – «Ертіс»: павлодарлықтар төтеп бере ала ма?

«Ертіс» қатарынан бес тур жеңілмей келеді. Бірақ бұл жолда күтпеген нәтижелер де болды – мысалы, «Атыраумен» тең ойын.

Өз кезегінде «Қайрат» та өткен турда «Каспиймен» ұпай бөлісіп, күтпеген нәтиже көрсетті. Чемпиондар бұл қателіктің кездейсоқтық екенін дәлелдеуге тырысады.