Fantasy QJ League: 2-турдан кейінгі халықтың сүйіктілері мен «күтпеген фавориттер»

Fantasy турнирінің жүздеген қатысушысы апта сайын болжам жасап, өз ойларынша ең тиімді құрамдарды жинақтайды – ал маусымға қатысып жатқан футболшылардың арасында халықтың сүйіктілері де, күтпеген «тосын» жұлдыздар да бар.

Екі турдан кейінгі ең танымал таңдау – «Қайрат» шабуылшысы Дәулет Орынбасар болып отыр. Рекордтық 11 Freedom-Coins бағасына қарамастан, оны қатысушылардың 67.37%-ы өз құрамына қосқан. Қазіргі таңда оның еншісінде 9 ұпай бар – 6+3.

Екінші орында – «Ақтөбе» қорғаушысы Хасен Артурұлы. Оған ойыншылардың шамамен жартысы – 43.19%-ы таңдау жасаған. 6 Freedom-Coins бағасына қарамастан, ол әр ойында төрт ұпайдан жинап, жалпы 8 ұпай еншілеп үлгерді. Бұл – оның командасы бірінші турда жеті гол жіберіп, үш ұпай айыппұл алғанына қарамастан.

Fantasy-футболдағы ойыншылардың үшінші ең танымал таңдауы – «Шахтер» командасының джокері Глеб Макридов (37.19%). Оның қоржынында 15 ұпай бар, соның 13-ін ол бірінші турда жинаған. Оны өз командаңызға қосу үшін 7.5 Freedom-Coins жұмсау қажет.

Осы үштіктен бөлек, үздік бестікке «Астана» шабуылшысы Мақсат Абраев (35.19%, 8 ұпай) пен «Қайрат» жартылай қорғаушысы Абылай Төлеухан (31.02%, 25 ұпай) кіреді. Қазіргі таңда екеуінің де бағасы – 9 Freedom-Coins.

Екі турдан кейінгі Fantasy QJ League-ның басты «күтпеген фавориттері» ретінде «Қайрат» қорғаушысы Раимбек Кеңесбековті (6.5 Freedom-Coins, 6.45%, 18 ұпай), сондай-ақ жартылай қорғаушылар Тамерлан Елтаевты («Астана», 6 Freedom-Coins, 3.39%, 15 ұпай) және Төре Исмағұловты («Қайрат», 8 Freedom-Coins, 1.11%, 15 ұпай) атауға болады.

Естеріңізге сала кетейік, әр тур қорытындысы бойынша ең тиімді құрамды жинаған қатысушылар Лига атынан бағалы сыйлықтарға ие болады. Маусым жеңімпазы iPhone 15 ұтып алады, ал екінші және үшінші орын иегерлеріне сәйкесінше PlayStation 5 Digital Edition және Xbox Series X табысталады.

Fantasy QJ League ережелерімен келесі сілтеме арқылы танысуға болады.