Қыздар турнирінің өткен матчтарындағы басты сәттерді ұсынамыз.
«Астана» бірінші орнын сақтап қалды
Елордалық команда Air Arena-да «Ертісті» қабылдап, 4:0 есебімен жеңіске жетті.
Үзіліске дейінгі жалғыз гол автогол болды – 36-минутта Стелла Бабурчина-Луклянец өз қақпасына доп жіберіп алды. Ал үзілістен кейін «Астана» басымдығын сенімді түрде арттырды: 47-минутта Софья Рыбак, 60-минутта команда капитаны Асыл Пазыл, ал 81-минутта алаңға қосалқы құрамнан шыққан Ляйсан Биккинина гол соқты. Айта кетейік, бұл кездесуде төрешілер бригадасы бірде-бір карточка көрсеткен жоқ.
«Астана» турнирде әлі жеңіліс таппаған жалғыз команда болып отыр: тоғыз турда сегіз жеңіс және бір тең ойын. Сонымен қатар Болат Сағынбаев шәкірттері лигадағы ең үздік қорғаныс көрсеткішіне ие – небәрі алты гол жіберген.
Николенконың еншісінде – 15 гол!
«Қайрат» көшбасшыны өкшелеп келеді. Ақтөбеде қазіргі чемпиондар елордадағы матчтағыдай 4:0 есебімен жеңіске жетті.
Есепті Милена Николенко ашып, кейін қонақтардың басымдығын еселей түсті – ол 33 және 73-минуттарда мергендік танытты. Артынша небәрі екі минуттың ішінде Жания Махаш пен София Ягудина бір-бір голдан соқты. Мұндай сценарий – «Қайраттың» визит карточкасына айналып үлгерді: тоғыз турда 55 гол.
Ал Николенко жеке көрсеткішін 15 гол және 7 нәтижелі пасқа жеткізді.
«Астанада» 25 ұпай, «Қайратта» – 24. Алматы командасының маусымдағы жалғыз жеңілісі дәл осы көшбасшымен кездесуде тіркелді (0:2). Келесі турда командалар қайтадан өзара ойнайды – бұл жолы Алматыда.
«Тобыл» бірінші болып гол жіберді, бірақ «Шахтерді» ірі есеппен жеңді
Қостанайда алаң иелері «Шахтерді» қабылдап, алғашқы минутта-ақ гол жіберіп алды – Дария Тулегенова есеп ашты. Алайда одан әрі ойын «Тобылдың» сценарийімен өрбіді: 33-минутта Алина Сартаева есепті теңестірді, ал екінші таймда қостанайлық команда тағы үш рет гол соғып, 4:1 есебімен жеңіске жетті.
Кездесудің басты қаһарманы үзілістен кейін алаңға шығып, дубль жасаған Ясмина Мантулина болды (68 және 88-минуттар). Оның екі голының арасында «Тобыл» капитаны Амура Карабаева пенальтиді сәтті орындады.
Бұл жеңіс қостанайлықтардың үш матчқа созылған жеңіссіз сериясын тоқтатып, қола жүлде үшін тартысты одан әрі шиеленістірді: «Ақтөбе», «Тобыл» және «Шахтер» 11 ұпайдан жинады, командалардың орны қосымша көрсеткіштер бойынша анықталады.
«Ордабасы» соғылмаған пенальтиден кейін есесін қайтарды
Шымкентте «Ордабасы» «Қайсарды» 2:1 есебімен жеңді.
28-минутта Шамсия Зарлыхан қонақтарды алға шығарды, ал 39-минутта алаң иелері есепті теңестіру мүмкіндігін пайдалана алмады – Балнұр Ергешбектің пенальтиін Арайлым Шарапат қайтарды.
Соған қарамастан, үзілістен кейін «Ордабасы» ойын барысын өзгертті: 51-минутта Юлдузхан Музрапова гол соқты, ал 58-минутта жеңіс добын Ергешбектің өзі енгізді.
Шымкенттік команда 10 ұпаймен алтыншы орында келеді және 11 ұпайдан жинаған үш клубқа барынша жақындады. Ал «Қайсар» турнир кестесін түйіндеп тұр: үш ұпай, тоғыз матчтағы сегіз жеңіліс және 39 жіберілген гол. Қызылордалықтар маусымдағы жалғыз жеңісін дәл осы «Ордабасыға» қарсы ойында (3:2) тіркеген еді, алайда қарымта кездесуде қарсылас реванш алды.
9-турдан кейінгі үздік бомбардир: Милена Николенко («Қайрат», 15 гол).
9-турдан кейінгі үздік ассистент: Жания Махаш («Қайрат», 11 нәтижелі пас).
