Freedom QJ League маусымының үздік шабуылшысына табысталатын Эдуард Сон атындағы сыйлықтың иегері белгілі болды.
2026 жылғы маусым қорытындысы бойынша бұл жеке марапат «Ордабасы» шабуылшысы Әділбек Тұрдахқа бұйырды. Ол сыйлықты жыл сайынғы QJL Awards марапаттау рәсімінде алды.
Әділбек 16 гол соқты – бұл Лигадағы екінші үздік көрсеткіш. Ол соңғы үш турдың әрқайсысында мергендік танытты. Сонымен қатар оның еншісінде 6 нәтижелі пас бар, ал баспен жасалған соққылар саны бойынша Әділбек турнирде көш бастады – 26. Шабуылшы маусымды флагмандық турнирдің қола жүлдесімен аяқтады, ал бір жыл бұрын U-17 турнирінде күміс медаль иеленген болатын.
Әділбек үшін әсіресе 11-тур сәтті өтті: «Ордабасы» сырт алаңда «Астананы» 4:1 есебімен жеңді, ал Тұрдах командасының төрт голына да тікелей үлес қосты – өзі бір гол соғып, үш нәтижелі пас берді. Ал 18-турда Дәулет Орынбасардың голына жауап ретінде соққан добы шымкенттіктерге «Қайратпен» тең түсуге (1:1) мүмкіндік берді. Бұл чемпионның маусымдағы ұпай жоғалтқан екі матчының бірі болды.
Еске сала кетейік, 2023 жылы Эдуард Сон атындағы сыйлықты Рамазан Бағдат («Қайрат»), 2024 жылы Нұрдәулет Орынбасар («Тараз»), ал былтыр Абылай Төлеухан («Қайрат») иеленген.
