Абраев және тағы басқалары: Премьер-лиганың алғашқы турында бірден бес QJ League бұрынғы ойыншсы дебют жасады

Негізгі жұлдыз – Мақсат Абраев

 

«Астана» маусымды «Жетісуды» 4:1 есебімен сенімді түрде жеңіп бастады. Құрамында тәжірибелі ойыншылар аз емес болғанына қарамастан, кездесудің басты назарында 18 жастағы шабуылшы Мақсат Абраев болды.

 

Жас форвард негізгі құрамда алаңға шығып, «Астананың» үш голына тікелей қатысқан ойыншылардың бірі болды. Алдымен ол 14-минутта Станислав Басмановтың нәтижелі шабуылына әкелген комбинацияда шешуші алғы пас берді. Бірінші тайм аяқталуға жақын өзі де гол соқты. Ал кейінірек дәл Абраевтың әрекеті нәтижесінде қауіпті айып добы белгіленіп, Марин Томасовтың голына жол ашылды. Мақсат 87-минутта алмастырылды.

 

Еске салайық, өткен маусымда Абраев Freedom QJ League турнирінде өте нәтижелі өнер көрсетті. Ол 18 матчта 9 гол соғып, 7 нәтижелі пас беріп, командасының күміс жүлде алуына үлкен үлес қосты.

 

Сондай-ақ ол QJL All Star құрамына шақырылып, мадридтік «Атлетикоға» қарсы көрме матчында маңызды гол соғып, ойынды пенальти сериясына жеткізді. Бұдан бөлек, Максат Freedom Media Cyber Cup турнирінің чемпионы атанып, бұл трофейді екінші талпынысында жеңіп алды.

 

Абраевтың жарқын ойыны Freedom Media көрермендерінің сүйіспеншілігіне ие болып, QJL Awards салтанатты рәсімінде оған арнайы жеке сыйлық — «Жыл перформансы» жүлдесін әкелді.

 

Әлиақбардың күтпеген дебюті

 

«Алтай» мен «Қайрат» арасындағы матч өскемендік клубтың қақпашысы Иван Коновалов үшін қиын өтті. Ол жарақат алып, бірінші тайм аяқталған соң алаңнан кетуге мәжбүр болды. Оның орнына 19 жастағы Әбілхайыр Әлиақбар шықты — ол осылайша Қазақстан Премьер-лигасында алғаш рет ойнады.

 

Жас қақпашы толқынысқа қарамастан өз қақпасын сенімді қорғады. Алайда ел чемпионы «Қайрат» бәрібір минималды жеңіске жетті — 64-минутта матчтағы жалғыз голды Жоржиньо соқты.

 

Айта кетейік, Әбілхайыр Freedom QJ League-тің алғашқы маусымында ойнаған. Ол сол кезде «Қайсар» мен кейін «Жас Қыран» командаларының қақпасын қорғады. Өткен маусымда ол Бірінші лигада өнер көрсетіп, «Алтайдың» Премьер-лигаға көтерілуіне елеулі үлес қосты.

 

Тағы үш дебют

 

Қазақстанның басты чемпионатында тағы үш жас футболшы да алғашқы матчтарын өткізді. Олар: «Астананың» жартылай қорғаушысы Руслан Валихан (ол «Жетісумен» матчтың соңғы минуттарында алаңға шықты), «Ақтөбе» шабуылшысы Мирам Кикбаев (ол «Тобылға» қарсы ойынның соңында пайда болды), «Атырау» жартылай қорғаушысы Нұрсейіт Бердеш (ол «Ұлытауға» қарсы кездесудің соңында дебют жасады).

 

Бұл — КПЛ-дың жаңа маусымындағы алғашқы тур ғана. Сондықтан биылғы жыл Freedom QJ League жүйесінде шыңдалған тағы да көптеген жас футболшылар үшін үлкен серпіліс жылы болуы әбден мүмкін.