Пазылдың жеті голдық әрекеті, «Қайраттың» «қазақстандық дербидегі» жеңісі: Freedom QJ League W 2-турының шолуы

Асыл Пазылдың таңғажайып ойыны

«Астана» «Жетісуды» 7:1 есебімен сенімді түрде жеңді. Бұл жеңістің басты қаһарманы 14 жастағы шабуылшы Асыл Пазыл болды – ол жеті голдың бәріне қатысып, покер жасап, үш нәтижелі пас берді.

Қазір Асыл екі турдан кейін бес гол мен төрт ассистпен «гол+пас» көрсеткіші бойынша маусымның үздік ойыншысы атанып тұр. Дегенмен, оның ең жақын қуалаушысы – «Қайраттың» София Ягудина – тек бір ассистке ғана артта қалып, бомбардирлік жарыста Пазылмен көш бастап тұр.

«Қайрат» «қазақстандық дербиде» ірі жеңіске жетті

Ақтөбеде алаң иелері есепті 4-минутта-ақ ашты – гол авторы Алуа Қалиева. Алайда интрига тек бірінші таймда ғана сақталды. Үзіліске дейін «Қайрат» есепті теңестіріп, алға шықты, ал екінші таймда алматылықтар тағы бес гол соғып, матчты 1:7 есебімен аяқтады.

Айта кету керек, «Қайраттың» қос голын бұрын «Ақтөбе» сапында ойнаған 15 жастағы Ангелина Остер соқты. Сондықтан бірінші голдан кейін ол қуаныш білдірмей, ал екінші голдан соң стадионда отырған анасына жүгіріп барып, құшақтады.

«Ордабасы» жеңісті жалғастыруда

Ербол Сарман баптайтын команда Павлодардан жеңіспен оралды – гол авторлары Балнұр Ергешбек пен Балсезім Талипбай. «Қайрат» пен «Астанамен» қатар «Ордабасы» – турнирдегі алғашқы екі ойынды жеңген жалғыз үш команданың бірі. Еске сала кетсек, дәл осы шымкенттіктер былтырғы 2008–2009 жылы туған қыздар арасындағы ҚР чемпионатын ұтқан болатын.

«Шахтер» Павлодардағы жеңіліс үшін реванш алды

Павлодарда ірі есеппен жеңілген қарағандылықтар өз алаңында ақталды – «Тобылды» 6:2 есебімен ұтты. Қызығы, «Шахтердің» алты голын алты түрлі футболшы соқты: Дарья Мартьянова, Дамира Мақсат, Малика Сарсен, Соғдиана Мирзахметова, Саида Дүйсембаева және Толғанай Амантай. Қостанайлықтардан Амура Қарабаева мен Алина Сартаева көзге түсті.

«Тобол» қатарынан екінші матчта ойынды аз құрамда аяқтады: 52-минутта Анна Ященко қарсыласқа гол соғуға айқын мүмкіндік бермегені үшін қызыл қағаз алды.