U-18 командаларының алдағы матчтарынан не күтуге болатынын талдаймыз.
«Тараз» – «Ақтөбе»
Бұл – турнирлік кестенің төменгі бөлігіндегі көршілердің кездесуі. Бірақ бұл тұжырым қате пікір қалыптастырмауы тиіс: өткен турларда оңтүстік өкілдері «Шахтер» мен «Жас Қыран» сияқты фавориттермен лайықты ойнады, ал «ақ-қызылдар» тіпті «кеншілерден» бірінші болып ұпай тартып алды. Сондықтан матч өте қызықты болатыны сөзсіз.
Айта кетейік, «Ақтөбе» бұл жекпе-жекті Әмірхан Панабековсіз өткізеді – өткен турда жартылай қорғаушы қызыл қағаз алған болатын. Сондай-ақ «Тараздың» пайдасына шешілетін жайттар – Расул Нұрманбайдың нәтижелі сериясы (қатарынан үш тур бойы гол соғып келеді) және қақпашы Диас Ундаштың жақсы көрсеткіштері (4 матчта 23 сейв). Бұл факторлар алаң қожайындарына көмектесе ме, оны жақында білетін боламыз.
«Шахтер» – «Тобыл»
Екі команда үшін де өте маңызды емтихан. Біріншіден, «Тобыл» турнирлік кестеде «кеншілерден» кейін бірден төртінші орында келеді – алайда олардың арасын төрт ұпай бөліп тұр. Жеңіс қостанайлықтарға көшбасшыларға жақындауға мүмкіндік береді, ал жеңіліс тапсырманы айтарлықтай қиындатады.
Өткен турда Олег Лотовтың командасы «Қайрат» сияқты фаворитке де «тіс көрсете» алатынын дәлелдеді – алматылықтар Қостанайдан минималды жеңіспен әрең қайтты, оның үстіне жеңіс голы матч соңында ғана соғылды.
«Шахтерге» келетін болсақ, қарағандылықтар Ақтөбедегі тең ойыннан кейін өз алаңында жанкүйерлерін қуантып, есе қайтарудан үмітті екені анық – әрі өздеріне қолайлы басымдықты қамтамасыз етуді көздейді.
«Қайрат» – ҚФФ Академиясы
ҚФФ Академиясы турнирлік кестеде бесінші орында келеді, бірақ «Қайсармен» шегерілген матч туралы ұмытпаған жөн – ал ойналған үш матчта флагмандық турнирдің ең жас командасы «Жас Қыранға» минималды есеппен жол берді, шымкенттіктердің автоголдары мен пенальтидің арқасында қиын күресте «Ордабасыны» жеңді, сондай-ақ «Каспийді» тас-талқан етті.
Бұл жас айырмашылығына қарамастан, «Қайраттың» мықты қарсыласпен кездесетінін көрсетеді. Бәлкім, дәл осы ҚФФ Академиясы осы маусымда «сары-қараларға» алғашқы болып гол соғатын команда атанар?
«Ертіс» – «Астана»
Павлодарлықтар әлі де ұпайсыз келеді. Бірақ «Астанада» да бәрі тамаша емес – төрт турда небәрі бес гол соғып, сегіз гол жіберіп алды. Жалғыз үйдегі кездесуінде «Ертіс» «Шахтерден» 1:2 есебімен ұтылды – сондықтан алдағы жекпе-жек елордалық командаға оңай жеңіс әкеле қоймасы анық.
«Ордабасы» – «Жас Қыран»
«Жас Қыранның» Шымкентке сапары көптеген голдарға ұласатыны сөзсіз – екі команданың да соңғы матчтары өте нәтижелі болды.
Расымен де, бұл «Ордабасыға» тиімсіз болуы мүмкін – шымкенттіктер үш автогол соғып, 3:4 есебімен жеңіліп қалған ҚФФ Академиясымен ойынды қайта еске түсірген жөн. Оның үстіне, алаң қожайындары бұл матчты Мұхит Абдулахмедсіз өткізеді – қорғаушы өткен турда қызыл қағаз алған еді.
«Каспий» – «Қайсар»
Ақтаулықтар – өткен төрт матчтың барлығында жеңілген екі команданың бірі. Дегенмен, қатарынан үш тур бойы «Каспий» 1:2 жақын есебімен жол беріп, тек ҚФФ Академиясынан ғана ірі жеңіліс тапты. Сондықтан «қасқырлармен» өтетін ойынның қалай өрбитінін алдын ала болжаудың қажеті жоқ.
