Асыл Пазылдың тарихы: «Астана» шабуылшысы Nursultan Qurman подкастында

Freedom QJ League алғашқы екі турының жұлдызы футболға қалай келгенін, ата-анасының бұл таңдауға көзқарасын және спорт пен оқуды қалай бірге алып жүргенін айтып берді.



Асыл Түркістан облысындағы Жетісай қаласында дүниеге келген. Ол жеті жасында, аулада құрбыларымен серуендеп жүргенде, балалардың футбол ойнағанын көріп, қызығушылық танытқан. Бұрын «Қайрат» жүйесінде ойнаған туған ағасы оған допты тебуді және пас беруді үйреткен. Кейін ата-анасы қызының футболға деген ықыласын қолдап, секцияға жаздырған.

Қазір Асыл 14 жаста, яғни өмірінің жартысын футболға арнаған. Дегенмен ол оқуын да екінші орынға қалдырмайды – күнделігінде бес пен төрт қана, ал сүйікті пәні – алгебра.

«Менің мақсатым – елді даңққа бөлеу, әйелдер футболының дамуына үлес қосу. Әр ойында бар күшімді салуға тырысамын. Гол соғып, өз деңгейімді дәлелдегім келеді», – дейді ол.

Еске салайық, Пазыл екі турда «Астананың» соққан тоғыз голының барлығына қатысып, бес гол мен төрт нәтижелі пас авторы атанды. Подкаст студиясында ол Лигадағы алғашқы жекелей марапатына – II турдың үздік ойыншысына арналған Mastercard жүлдесіне ие болды.