Қабілет іске кірісті: QJL Al Star матчына орай ССБ спорттық күнделіктер әзірледі

Бұл күнделіктер спорттық психологтың футболшылармен көпжылдық жұмыс тәжірибесіне сүйене отырып дайындалған. Олар дәлелденген құрылымды, психологиялық тереңдікті және қолдануға ыңғайлылықты біріктіреді.

Күнделіктерде күнделікті толтыратын бөлімдер бар: жаттығу мақсаты, өзін қалай сезінетіні, эмоциялық күйі, жетілдіруді қажет ететін тұстар, ризашылық пен жетістіктер. Бұған қоса, апталық және айлық қосымша айдарлар қарастырылған: жоспарлау, прогресс кестелерін талдау, мақсаттар мен стратегиялар. Сондай-ақ, позитивті көңіл күй қалыптастыру үшін өзіндік рефлексия мен алғыс білдіруге арналған бағандар және қысқа мерзімді әрі ұзақ мерзімді мақсаттарды белгілеуге арналған бөлім бар.

Осылайша, күнделіктер тек жаттығу барысын ғана емес, сонымен қатар психоэмоционалдық жағдайды да бақылауға мүмкіндік береді – физиологиялық көрсеткіштер мен ішкі сезімдердің жазбалары негізінде.

Динамиканы бақылау күштің, төзімділіктің, зейіннің және эмоциялық тұрақтылықтың артуын белгілейтін арнайы кестелер мен графиктердің көмегімен жүзеге асырылады.

«Әрбір мұндай күнделік – қолыңыздағы жеке бапкер мен психолог іспеттес. Ол сіздің жетістіктеріңізді көрсетіп, әлсіз тұстарыңызды анықтайды, мақсат қоюға, эмоцияны басқаруға және чемпиондық менталитет қалыптастыруға көмектеседі. Бұл – футболшыны өзін және өз дамуын шебер бақылай алатын, үнемі жетілу үстіндегі кәсіби ойыншыға айналдыратын құрал», – деп түсіндірді ССБ менталдық дайындық бойынша сарапшысы Тамара Ахметали.

Ол спорттық күнделік жүргізудің бірден бірнеше маңызды әсері бар екенін атап өтті. Атап айтқанда: темірдей тәртіп қалыптастыру, психологиялық тұрақтылық пен мықты ойлау жүйесін дамыту, зейін мен шоғырлануды күшейту, сондай-ақ өз-өзіне деген сенімділік пен мотивацияны арттыру және жаттықтырушымен байланысты нығайту.

QJL All Star мен мадридтік «Атлетико» арасындағы матч 23 тамыз күні Алматыда өтеді. Билеттерді Freedom Ticketon сайтынан сатып алуға болады.