Ақтөбедегі ойсырай жеңілу және «Жас Қыранның» жеңісі: Freedom QJ League-тің 15-турынан не білу керек

«Тараз» «Тобылды» ұтты

Қостанай клубы тағы да «Тараздан» ұпай тартып ала алмады – өз алаңында оңтүстіктегілер жеңіске жетті. Дегенмен, оңай болмады – әсіресе есепті «Тобыл» жартылай қорғаушысы Роман Гаврилюк ашқанын ескерсек.

Гол жіберген соң, «Тараз» белсенділігін арттырып, екі минут ішінде екі доп соқты – Ерсултан Байтен мен Дәулет Мүсретбек көзге түсті. Үзілістен кейін Тлеукабыл Қанатбек есеп айырмасын екі допқа дейін ұлғайтты. «Тобыл» тек бір гол соғып үлгерді – Нұрмұбарак Жақсылықтың еншісінде. Қорытынды есеп – 3:2.

Айта кетерлігі, есептің жақындығына қарамастан, xG көрсеткіші «Тобыл» үшін мүлде көңіл көншітпеді – бар болғаны 0.55, ал «Таразда» – 3.07 күтілетін гол.

«Ақтөбеге» ауыр күн

«Қызыл-ақтар» күтпеген жерден өз алаңында «Ордабасыдан» ойсырай жеңілді.

Шымкент клубы «Ақтөбеге» сегіз гол соқты – Жанәлі Есенәліев хет-трик жасаса, Ахан Серік дубльмен көзге түсті, бір-бір голдан Әбдурахман Орумбаев, Құдірет Ботабек және Асхат Жанбырбай еншілеп, мергендер қатарына қосылды. Иелерінің жалғыз голын Әмір Төлеев соқты.

Қонақтар қақпаға дәл соққыны екі есе көп бағыттады – 16 қарсы 8, бірақ допқа иелік ету жағынан айтарлықтай аз болды – 34% қарсы 66%. Турнир кестесінде алтыншы орында тұрған шымкенттіктер медаль үшін күресті жалғастыруда, ал сегізінші орында тұрған «Ақтөбе» қола жүлде аймағынан тоғыз ұпайға қалып келеді – бірақ «Тобылға» қарсы бір ойыны қорда бар.

Асанхан «Ертісті» тежеді

Павлодарлықтар Қызылордада ұпай жоғалтты – өткен турда «Жас Қыранға» есе жіберген «Қайсар» кезекті матчта тең түсті (2:2). Бұл жолы «қасқырларға» қонақтардың жылдам қызыл карточкасы көмектесті – 8-минутта-ақ Сәкен Айтмұхамбет алаңнан қуылды.

Осыдан көп ұзамай Ерасыл Асанхан алты минут ішінде дубль жасады, алайда «Ертіс» есеп айырмасын жойып үлгерді – павлодарлықтардан Әбілмансұр Қасымтай мен Руслан Рахметов мерген атанды.

«Жас Қыранның» қиын жеңісі

Атырауда белгілі бір сенсация орын алуы мүмкін еді – мұнайшылар «Жас Қыранмен» ойынды нөлдік тең есепке жеткізуге жақын болды. Дегенмен, екінші таймның қосымша уақытында 58-минутта алаңға шыққан Азамат Асқарұлы гол соғып, алматылықтарға жеңіс сыйлады.

«Астананың» көңілді жеңісі

Ақтауда «Каспий» мен «Астана» қосылып тоғыз гол соқты – соңғы ысқырықта таблода 3:6 есебі тіркелді. Нұрғазы Құсайын дубль жасап, Әбілқайыр Жармұхамбетке пас бергенімен, астаналықтар айқын басым болды – Тамерлан Елтаев, Алан Азамат, Санжар Қуандық, Ален Пак, Асланбек Марат және Мәқсат Әбраев мергендер қатарына енді.

Нәтижесінде тең ойындар сериясы үзілген ақтаулықтардың еншісінде 15-турдан кейін 9 ұпай қалды – олардың төменінде тек «Тобыл» (7) тұр, бірақ қостанайлықтардың екі ойыны қорда бар.

«Қайратқа» еш қиындық болған жоқ

Ақырында, өткен турда кезекті сенімді жеңісіне «Қайрат» қол жеткізді. Алматы клубы өз алаңында «Шахтерге» төрт жауапсыз гол соқты. Екі гол және бір ассист – Абылай Төлеуханның еншісінде. Сондай-ақ, Дәулет Орынбасар да жақсы ойын көрсетті – бір гол соғып, Қайсар Малаевқа пас берді.

Осылайша, өткен турдың басты ұтушысы, жеңіске оңай жетпесе де, «Жас Қыран» болды – алматылықтар үшінші орында тұрған «Шахтерден» төрт ұпай алда және бір ойыны қорда бар. Дегенмен, «кеншілер» 16-турда Сергей Киров командасымен кездесіп, арақашықтықты сақтап қалуға мүмкіндік алады