Трибунадағы ыстық қолдау: Лиганың үй матчтарына ең көп жанкүйер жинаған клубтар

Осы көрсеткіш бойынша Freedom QJ League 2025 көшбасшыларын назарларыңызға ұсынамыз.

Бірінші орын – «Тараз»

Оңтүстіктен шыққан команда флагмандық турнирде өз алаңындағы матчтарға ең көп көрермен жинаған клуб атанды. «Тараздың» бір ойынына орта есеппен 445 жанкүйер келген, ал U-18 командасының 11 турдағы жалпы үй матчтарына қатысу көрсеткіші 4 892 адамды құрады.

Жас құрамалар да жанкүйерлер қолдауынсыз қалған жоқ: өткен маусымда «Тараздың» U-17 және U-16 командаларының үй ойындарын тиісінше 3 217 және 2 850 көрермен тамашалаған.

Айта кету керек, клуб бұл көрсеткіш бойынша қатарынан үшінші жыл көшбасшылар қатарында. 2023 және 2024 жылдары да тараздықтар үздік үштіктен көрінген. Осындай тұрақты нәтижелердің арқасында «Тараз» өткен маусым қорытындысы бойынша Сеильды Байшаков атындағы «Маусымның үздік маркетингі» сыйлығын иеленді — бұл клуб тарихындағы екінші марапат.

Ойыншылар қатысқан бейне-шақырулар, сыртқы жарнама, матч күндеріндегі ойын-сауық бағдарламалары, балаларға арналған шеберлік сабақтары, Лига, серіктестер және жергілікті БАҚ-пен тұрақты жұмыс — осының бәрі тараздық жас футболшыларға қала тұрғындарының тұрақты қолдауын қамтамасыз етті.

Екінші орын – «Каспий»

Ақтаулық клубтың флагмандық турнирдегі үй матчтарына орта есеппен 251 көрермен жиналған. Маусым бойындағы жалпы көрсеткіш — 2 754 адам.

Салыстырар болсақ, «Каспийдің» дебюттік маусымындағы орташа келушілер саны небәрі 167 адам болған. Қазіргі өсім айтарлықтай — бұған 2024 жылы Ақтауда өткен Лига матчдэйі мен қазақстандық жасөспірімдер футболының жалпы танымалдығының артуы әсер еткен болуы мүмкін.

Үшінші орын – «Жас Қыран»

Үздік үштікті алматылық «Жас Қыран» түйіндеді — маусым бойы 2 482 көрермен, бір матчқа орташа 226 адам.

«Тараз» бен «Каспийден» айырмашылығы, «Жас Қыранның» өз қаласында тікелей бәсекелесі бар — «Қайрат». Соған қарамастан, клуб маусым бойы команданы тұрақты қолдаған жанкүйерлер ядросын қалыптастыра алды.

Толық тізім:

«Тараз» — 4 892 көрермен (орташа 445)

«Каспий» — 2 754 (251)

«Жас Қыран» — 2 482 (226)

«Ертіс» — 2 208 (201)

«Шахтер» — 2 202 (201)

«Ақтөбе» — 2 165 (197)

«Атырау» — 1 856 (169)

«Қайрат» — 1 758 (160)

«Тобыл» — 1 659 (151)

«Ордабасы» — 1 529 (139)

«Қайсар» — 1 445 (132)

Айта кетерлігі, өткен маусымда барлық матчтарын көрерменсіз өткізген жалғыз клуб — «Астана». Бұған елордалық командалардың өз алаңындағы ойындарын жанкүйерлерге арналған трибуналары жоқ жабық Футбол үйінде өткізуі себеп болды.