«Ордабасы» «Астананы» жеңді, «Каспий» маңызды ұпайға ие болды: Freedom QJ League-нің 10-турынан не білу керек

Көптен күткен жеңіс

Турдың басты сәттерінің бірі – «Ордабасы» клубының Астанада «Астананы» жеңуі болды. Елордалықтар бірінші айналым аяқталуға жақын кезде жүлде жарысындағы жағдайын қиындатып алды, ал шымкенттіктер төрт матчқа созылған жеңіліс сериясын тоқтатты.

Бірінші таймда алаң иелері үшін еш қауіп болмағандай көрінген – 26-минутта Руслан Уәлихан есеп ашып, үзіліске дейін «Астана» алда тұрды. Алайда екінші таймда қонақтар қарқынын арттырды: алдымен Максим Гамаюнов Сұлтанбейбарыс Әбдіғаппаровқа нәтижелі пас берсе, он минуттан кейін өзі гол соғып, командасын алға шығарды.

Матч соңында шиеленіс күшейді – қосымша минуттарда Найль Мынжасаров таразы басын теңестірді. Бірақ қуаныш ұзаққа созылмады – бұрыштаманы орындау кезінде Али Аскербеков өз қақпасына гол соғып, «Ордабасыға» жеңіс сыйлады.

Макридов жарқырауын жалғастыруда

Қарағандыда «Шахтер» «Тоболды» сенімді түрде жеңді – қатарынан екінші матчта команда көшбасшысы болып Глеб Макридов танылды. Ол 32-минутта Ислам Қалиден пас алып, есеп ашты. Дегенмен үзілістен кейін Жан Көпжасаров таразы басын теңестіріп үлгерді.

Бірақ 48-минутта Василий Леонтьев «Шахтерді» қайта алға шығарды, ал Макридов екі нәтижелі паспен басымдықты бекемдеді – Мирас Қуат пен Илья Гезик гол соқты. Қорытынды есепті Никита Нефедов орнатты – 5:1.

Макридов соңғы үш ойында 9 нәтижелі әрекет жасап отыр. Ол «гол+пас» жүйесі бойынша маусымның үздік үш ойыншысы қатарына кіреді – Глебтің еншісінде 13 ұпай (7 гол + 6 пас), дәл осындай көрсеткіш «Қайрат» ойыншысы Даулет Орынбасарда (10+3). Ал көш бастап тұрған – Абылай Төлеухан (12+6).

«Каспийдің» екінші жеңісі

Ақтаудағы матч алаң иелері үшін сәтті өтті – олар бірінші таймда екі гол соғып, екінші таймда басымдықты сақтап қалды. Шыңғыс Қуанышұлы мен Нұрғазы Құсайын гол соқты. «Атырау» сапынан Дінмұхаммед Бақытжан Рамиль Жеңісовтің пасынан кейін жауап қайтарды – 2:1.

«Атыраудың» сәтсіз сериясы төрт матчқа ұласты, ал «Каспий» аутсайдер мәртебесінен құтылып, төменгі бөліктегі бәсеке шиеленісе түсті.

«Ертіс» пен «Жас Қыран» тең түсті

Павлодарда жүлдеге үмітті екі команда ұпай бөлісті. 12-минутта Руслан Рахметов есеп ашқанымен, 15-минутта Жанғирхан Жанқұразов жауап қайтарды – матч 1:1 есебімен аяқталды.

«Ертіс» 19 ұпаймен үшінші орында, «Жас Қыран» бір ұпай кем жинаған.

Қызылордада шиеленісті кездесу

«Қайсар» «Таразбен» ойында жеңісті уыстан шығарып алды – 59-минутта Әлібек Жарылқасынұлы гол соқты, бірақ қосымша минуттарда Азамат Асқарұлы есепті теңестірді.

Матчта үш қызыл қағаз көрсетілді: алаң иелерінен Берік Жүсіп, қонақтардан Азизжон Бердиев пен Санжар Рахматилла келесі ойынды өткізіп алады.

«Қайрат» «Ақтөбені» ойсырата жеңді

«Сары-қаралар» маусымдағы тоғызыншы жеңісін оңай алды – олар принципиалды қарсылас қақпасына жауапсыз алты гол соқты.

Кездесудің үздік ойыншылары – Даулет Орынбасар (хет-трик), Аламгир Смақов (бір гол және екі пас), Абылай Төлеухан (үш пас).

Төлеухан алдыңғы турда «Қайрат-Жастар» сапында Бірінші лигада ойнағандықтан, негізгі командаға енді ғана оралды – бірақ нәтижелі ойынын жалғастыруда: ол осы маусымда тек бір ғана ойында нәтижелі әрекет жасамаған.

Лиганың спорттық-сараптамалық бөлімінің Telegram арнасына жазылыңыздар

«БАСПЕН ОЙНА» шоуының жаңа шығарылымын көріңіздер!