Маусымның басты қаһармандары: Freedom QJ League W көшбасшылары жеке көрсеткіштер бойынша

Сіздерге маусым көшбасшыларын бірқатар негізгі көрсеткіштер бойынша таныстырамыз.

Бомбардирлік жарыс: Николенкоға жету мүмкін бе?

Алғашқы маусымда ең көп гол соққан – Милена Николенко («Қайрат», 24). Оның артынан Асыл Пазыл («Астана», 19) және Софья Рыбак («Астана», 17) келеді.

Айта кетейік, «Қайрат» шабуылшысының бұл нәтижеге жетуіне қарсыластарына қарағанда әлдеқайда аз уақыт қажет болды – бар болғаны тоғыз матч (601 минут).

Соңғы турда «Астана» «Шахтерге» қарсы ойнайды. Асылға Миленамен теңесу үшін пента-трик қажет – әрине, Николенко «Тобылға» гол соқпаса ғана.

Голдық пас: Махаштың үстемдігі

Ассист саны бойынша көшбасшы – Жания Махаш («Қайрат»). Оның еншісінде 12 матчта 21 нәтижелі пас бар. Екінші орынды София Ягудина («Қайрат») мен Асыл Пазыл («Астана») бөлісуде – әрқайсысында 12 пас.

Жания үшін ең табысты матч «Тобылға» қарсы кездесу болды – ол ойында командасы 11:1 есебімен жеңіске жетіп, футболшы бірден төрт нәтижелі пас берді. Сондай-ақ ол Қостанайда бір голмен де көзге түсті.

Қызығы, Жания – Freedom QJ League тарихындағы үздік ассистент. Екінші орында – Даулет Орынбасар, ол екі маусымда 19 нәтижелі пас берген.

«Гол+пас» бойынша кім үздік атанады?

Жалпы нәтижелі әрекеттер статистикасында үлкен интрига бар. «Гол+пас» жүйесі бойынша бірден үш футболшы көшбасшылыққа таласуда: осы материалда аталған Милена Николенко, Жания Махаш және Асыл Пазыл. Әрқайсысының еншісінде – 31 ұпай. Алдағы демалыс күндері бұл жарыстың шешуші кезеңіне айналады.

Еске салайық, Freedom QJ League соңғы турының барлық матчтары 21 қыркүйек күні сағат 14:00-де бір уақытта басталады.