«Хан-Тәңірінің» сүрінуі және «Елімайдың» камбэгі: Freedom QJ League B 7-турының басты сәттері

«Жеңіс» пен «Жайық» «Хан-Тәңірінен» ұзап кетті

«Астана Аренада» «Жеңіс» «Хан-Тәңірін» 5:1 есебімен ойсырата жеңді. Абыз Ерғалиұлы дубль жасап, бір нәтижелі пас берді. Тағы бір-бір голдан Дәуіт Хусен, Әмірхан Абай және Темірлан Қайыржан соқты. Алматылықтар сапынан Тимур Дешко ғана есепті «жібіте» алды.

Сәл кейінірек өз матчында «Жайық» та сенімді жеңіске жетті – турнир кестесінің көшбасшылары Петропавлға барып, «Қызылжарды» 3:0 есебімен ұтты. Рами Жақсылық дубль жасаса, тағы бір голды Ерасыл Кәрім енгізді.

Осылайша алматылықтар чемпиондық бәсекедегі қарсыластарынан үш ұпайға қалып қойды.

«Оқжетпес» «Жетісуды» басып озды

Көкшетауда өткен «Оқжетпес» пен «Жетісу» арасындағы матч алаң иелерінің ірі жеңісімен аяқталды – 4:0. Әр голдың авторы бөлек болды: Абильмансур Хамит, Нұралы Сабыржан, Альмерек Карбаев және Роман Андреев мергендік танытты.

Осы жеңістің арқасында «синегорлықтар» турнир кестесінде Талдықорған командасын басып озып, төртінші орынға көтерілді. «Хан-Тәңіріне» дейін – үш ұпай, ал көш бастап тұрған «Жеңіс» пен «Жайыққа» дейін – алты ұпай.

«Оңтүстіктің» маңызды жеңісі

Бұған дейін қатарынан екі матчта жеңілген Шымкент командасы «Атырау» қақпасына жауапсыз үш гол соқты. Алдымен Диярбек Откурбаев пенальтиді сәтті орындады, кейін Арда Мұхтаров пен Рауан Джурумбетов есепті ірілендірді.

Freedom QJ League B-ның екі дүркін чемпиондары бұл маусымда әлі де жүлделі орындар үшін күреске қайта қосыла алады. Қазір команда турнир кестесінде жетінші орында тұр, бірақ алда тағы 11 тур бар, ал үшінші орыннан айырмасы небәрі алты ұпай.

«Алтай» соңғы минуттарда жеңісті уысынан шығарды

Осы маусымда әлі бірде-бір қарсыласын жеңе алмаған турнирдегі жалғыз команда өткен турда жеңіске өте жақын болды – «Елімайға» қарсы өз алаңындағы матчта «Алтай» 86-минутқа қарай 2:1 есебімен алда тұрды.

Алайда қонақтардың жоспары басқа болды. Қалған аз уақыттың ішінде Семей өкілдері екі гол соқты: Анас Адылханов пен Муслим Сейткалиев көзге түсті. Осылайша алаң иелері турнирдің аутсайдері болып қала берді.

7-турдан кейінгі үздік сұрмерген: Жанади Жұмабек («Хан-Тәңірі», 7 гол).
7-турдан кейінгі үздік ассистенттер: Нұралы Сабыржан және Абильмансур Хамит, екеуі де – «Оқжетпес», 4 нәтижелі пастан.