Freedom QJ League-дан кәсіпқой футболға: 2025 жылы 350-ден астам жас ойыншы ересектер деңгейінде өнер көрсетті

Өтіп бара жатқан жылы Freedom QJ League тәжірибесі бар 368 футболшы кәсіби турнирлерде ойын уақытын алды.

Олардың ішінде 25 ойыншы ҚПЛ-да, 143 футболшы Бірінші лигада, ал тағы төрт жас ойыншы шетел чемпионаттарында өнер көрсетті.

Дайындаған ойыншылар саны бойынша көшбасшылар қатарында «Қайрат», «Астана» және «Ордабасы» академиялары аталды. Сонымен қатар «Ақтөбе» мен «Жас Қыран» академиялары да ерекшеленеді — бұл клубтардың тәрбиеленушілері Бірінші лигада тұрақты түрде ойын тәжірибесіне ие болуда.

Сондай-ақ футболшының ойын уақытын алып жүрген лигасының деңгейі мен бәсекеге қабілеттілігін бағалайтын арнайы индекс әзірленді.

Осы көрсеткішке сәйкес, ҚПЛ мен Чемпиондар лигасында өнер көрсеткен «Қайрат» ойыншыларымен (Дастан Сатпаев, Шерхан Қалмұрза, Рамазан Бағдат, Азамат Тұяқбаев, Олжас Байбек) қатар, кәсіпқой деңгейде ең бәсекеге қабілетті футболшылардың бірі ретінде Темірлан Мұрзағалиев («Ақтөбе» тәрбиеленушісі, қазіргі клубы — «Қайсар»), сондай-ақ Бірінші лигада ойнап жүрген жас ойыншылар атап өтілді.

Көптеген жас футболшылардың ойын уақыты мен дамуына Бірінші лигада қолданыстағы жас ойыншылар ережесі айтарлықтай ықпал етті. Олардың қатарында Әбілқайыр Алиақбар («Қайсар» / «Жас Қыран» тәрбиеленушісі, «Алтай» ойыншысы), Тимур Курбанов («Жас Қыран» тәрбиеленушісі, «Каспий»), Тамерлан Агиманов («Ертіс») және Артем Литош («Қайрат» тәрбиеленушісі, «Шахтер») бар.

Осылайша, Freedom QJ League қазақстандық футбол экожүйесіндегі маңызды рөлін жалғастырып, жасөспірімдер деңгейінен кәсіби лигаларға біртіндеп әрі тиімді өтуге барлық жағдайды қамтамасыз етіп келеді.