FF Manager жобасы халықаралық Go Digital Eurasia конференциясында таныстырылды

Бұл іс-шара бизнесті инновациялық дамыту мен цифрлық трансформацияны жүзеге асырып жүрген ірі кәсіпорындар мен корпорациялар басшыларына арналған.

Конференцияға FFM платформасының әзірлеушілерінің бірі болып табылатын «Байт Майндс» (Fuse8) компаниясының өкілдері шақырылды. Сарапшылар өнімді жасау процесі туралы айтып берді — ол небәрі алты айдың ішінде әзірленіп, іске қосылған. Сонымен қатар, Қазақстандағы жасөспірімдер футболын цифрландырудың өзге де қырларына тоқталды.

«FF Manager платформасы жобасымен осындай беделді «Go Digital Eurasia» конференциясына қатысу – Лига қандай сапалы өнім жасағанын тағы бір мәрте дәлелдейді», – деді іс-шарада QJ League атынан сөз сөйлеген Юрий Воропаев.

«Финтех, өндіріс, жасанды интеллект және басқа да салалардағы жоғары бюджетпен жүзеге асырылған цифрлық шешімдер арасында біздің жоба елеусіз қалмай, керісінше, көрермендердің үлкен қызығушылығын тудырғаны қуантады. Көптеген сұрақтар қойылып, соның арқасында Лиганың цифрландыру саласындағы басқа жобалары туралы да аз-кем айтып өтуге мүмкіндік туды», – деп қосты ол.