Қарағандыдағы сегіз гол және өзге нәтижелер: Freedom QJ League-тің 7-туры қалай өтті

«Ордабасы» «Қайратқа» төтеп бере алмады

Тимур Сегізбаев атындағы стадионда өткен матч алаң иелерінің пайдасына 3:0 есебімен аяқталды. «Қайрат» сапында Абылай Жылқайдар, Абылай Төлеухан және Әлихан Жұмабек гол соқты.

Осылайша, «сары-қаралар» 7-турдан кейін де турнирлік кестені сенімді түрде бастап тұр – 21 ұпайдың 21-ін жинады. Ал «Ордабасыға» жүлделі орындарға таласатын командалар қатарына кіру қиындай түсті: үшінші орында келе жатқан «Жас Қыраннан» қалып қоюы алты ұпайды құрайды.

Акимов таңғалдыруын жалғастырып келеді

Жарыс жолында екінші орында қарағандылық «Шахтер» келеді. «Қайратпен» қатар бұл команда әзірге жеңіліс көрген жоқ – тек 4-турда «Ақтөбемен» болған тең ойын статистиканы сәл бұзды. Өткен уикендте кеншілер «Қайсарды» 8:0 есебімен ойсырата жеңді.

Матчтың басты қаһарманы хет-трик авторы Расул Акимов болды. Соңғы үш матчта ол жеті гол соқты, ал маусым бойы оның еншісінде 9 гол және 2 ассист бар. Бұл оны сұрмергендер жарысының айқын көшбасшысы етіп қана қоймай, флагмандық турнирде «гол+пас» жүйесі бойынша екі таңбалы көрсеткішке жеткен алғашқы ойыншы атандырды.

Акимовтан бөлек, қызылордалықтарға Ален Пак дубль жасаса, Александр Яковлев, Мейірлан Балтабаев және Даниял Амантай бір-бір голдан соқты. Айта кетейік, «қасқырлар» матчтың басым бөлігін бір ойыншыға кем өткізді – 14-минутта Айтуған Абдрахман алаңнан қуылды.

«Жас Қыран» «Қаспийді» жеңді

Ақтаудағы матч алматылық қонақтар үшін сәтті өтті – «Жас Қыран» «Қаспий» қақпасына жауапсыз үш гол соқты. 27-минутта Алан Луканин есеп ашты, кейін Нұрбол Нұрлан дубль жасап, таблодағы соңғы нәтижені бекітті.

Бұл «Жас Қыранның» бір айдан астам уақыт ішіндегі алғашқы жеңісі. Бұған дейін Олег Трофимов командасы «Ордабасымен» (0:0) және «Астанамен» (1:2) өткен матчтарда ұпай жоғалтқан еді.

«Ақтөбе» елордада тең ойынды жұлып алды

Air Arena қабырғасында өткен ойын өте тартысты әрі оқиғаға толы болды – «Астана» мен «Ақтөбе» 3:3 есебімен тең түсті.

Алғашқы гол ерте соғылды және оны қонақтар енгізді – «қызыл-ақтардың» қорғаушысы Роман Шаповалов 3-минутта есеп ашты. 32-минутта Қуандық Хамидуллин таразы басын теңестірді, бірақ үзіліске аз уақыт қалғанда «Ақтөбе» қайта алға шықты – Аян Аманжұлов мергендігімен көзге түсті.

Дегенмен елордалық команда берілмеді – екінші таймда Санжар Қуандық дубль жасады: алдымен пенальтиден, кейін ойыннан гол соқты. «Астана» жеңісті тойлайтындай көрінген, бірақ қосымша уақытта кездесудің соңғы голын «Ақтөбе» шабуылшысы Ашер Асхат өз атына жазды.

Бұл гол болмағанда, елордалық клуб «Ордабасыны» төртінші орыннан ығыстырып, «Жас Қыранға» жақындай түсер еді. Алайда қазір де «Астананың» жағдайы жаман емес – Константин Чернявскийдің шәкірттері шымкенттіктер сияқты 10 ұпай жинаған.

Павлодардағы нөлдер

Турдың басқа командаларынан айырмашылығы, «Ертіс» пен «Тобыл» көрермендерді нәтижелі ойынмен қуанта алмады – кездесу 0:0 есебімен аяқталды.

Бір ұпай еншілеген «Ертіс» енді «Қаспийден» минималды басымдыққа ие. Ал қостанайлық команда турнирлік кестенің орта тұсында орналасқан – оны төртінші орыннан да, оныншы орыннан да небәрі екі ұпай бөліп тұр.

«Тараз» бен Академия КФФ гол алмасты

«Тараз» өз алаңында алғаш рет жеңіске жете алмады – Академия КФФ-пен өткен матч 1:1 есебімен аяқталды. 8-минутта Ануар Төленді қонақтарды алға шығарса, 33-минутта Ғалымжан Оразалиев таразы басын теңестірді. Бұдан кейін гол соғылған жоқ.

Самат Наурызбаев командасы турнирлік кестенің жоғарғы жартысын түйіндеп тұр, алайда төменгі бөлікте тығыздық өте жоғары. Бұған айқын дәлел: Академия КФФ тоғызыншы орында орналасқанымен, «Тараздан» небәрі бір ұпайға қалып келеді. Алдағы күрес қызықты болмақ.

7-турдан кейінгі үздік сұрмерген: Расул Акимов («Шахтер», 9 гол).
7-турдан кейінгі үздік ассистент: Дияр Рахимжанов («Ордабасы», 4 пас).