Емтихан үзілісінің алдында: флагмандық турнирдің 6-турына превью

«Ордабасы» – «Каспий»

Бес турдан кейін шымкенттік команда көшбасшылар үштігінен алты ұпай қалып келеді – бұл айтарлықтай үлкен алшақтық. Мұндай жағдайда «Каспиймен» ойында ұпай жоғалту оңтүстік үшін кешірілмейтін қателік, әсіресе өткен демалыста өз алаңында «Жас Қыранмен» өткен нәтижесіз (0:0) матчтан кейін.

Дегенмен, өткен уикэндте алғашқы жеңісіне қол жеткізген ақтаулықтар сырт алаңға көтеріңкі көңіл-күймен аттанатыны анық. «Каспийдің» төрт жеңілісінің үшеуі 1:2 есебімен, тартысты өткенін де ұмытпаған жөн. Соңдықтан бұл ойын тартысты әрі қызықты болмақ.

«Жас Қыран» – «Астана»

Өткен турда «Жас Қыран» чемпионатта алғаш рет ұпай жоғалтты – жоғарыда айтылғандай, Шымкентте «Ордабасы» қақпасының кілтін таба алмады.

Бірақ бұл жағдай алматылықтардың басқа матчтардағы жоғары нәтижелілігіне көлеңке түсіре алмайды. 18 соғылған және 8 жіберілген гол – тек «Қайрат» қана бұдан үздік шабуылмен және доп айырмашылығымен мақтана алады.

«Астананың» еншісінде тек алты ұпай бар – «Ордабасы» мен «Каспийдің» жағдайындағыдай, «Жас Қыраннан» жеңілу елордалық команданың медаль үшін күрестегі мүмкіндігін айтарлықтай қиындатады. Команда ойыншылары ұзақ үзіліске қандай көңіл-күймен кетеді? Жақында білетін боламыз.

«Қайсар» – «Қайрат»

Қазіргі чемпиондар жеңісті шеруін жалғастыруда: 15 мүмкін ұпайдан 15 ұпай, 28 соғылған гол және өткен турда ҚФФ Академиясынан жіберілген тек бір ғана доп.

Ал «Қайсар» алғашқы турдағы ең төменгі есеппен (минималды) қол жеткізген жеңісінен кейін, кейінгі матчтардың бәрінде жеңіліс тапты. Оның үстіне, алдағы кездесуде «қасқырларға» бірден екі ойыншы көмектесе алмайды – өткен турда Самир Бақытжан мен Мәди Жеңісұлы қызыл қағаз алған болатын.

Осындай жағдайға қарамастан, футболда әрдайым сенсацияға орын бар. Оның үстіне «Қайсардың» қорында тағы бір ойын бар – сәттілік серік болса, қызылордалықтар соңғы орыннан турнирлік кестенің жоғарғы бөлігіне бір-ақ секіруі мүмкін. Сондай-ақ «сары-қаралардың» үстемдігі оларды кез келген қарсылас үшін басты нысанаға айналдырады.

ҚФФ Академиясы – «Шахтер»

Жоғарыда айтылғандар ҚФФ Академиясына да қатысты. Егер Ерлен Бекмұхаевтың командасы «кеншілерді» жеңіп, бір аптадан кейін «Қайсардан» да басым түссе, олар медаль үшін жарысқа қосылады – ойыншылардың бұл сценарийді қаперінде ұстап отырғаны анық.

Алайда «Шахтермен» кездесу оңай болмайын деп тұр. Қарағандылықтар қорғаныста өте ширақ ойнайды – бес матчта тек екі гол жіберген. Бұдан аз көрсеткіш тек «Қайратта», ал одан кейін бес гол жіберген «Тобыл» келеді.

ҚФФ Академиясының тәрбиеленушілері бес турдан кейін соғылған және жіберілген доптар айырмашылығы нөлдік көрсеткішке ие жалғыз команда екенін айта кеткен жөн: 11-11. Шабуылда қауіпті, қорғаныста тұрақсыз – флагмандық турнирдің ең жас командасын осылай сипаттауға болады.

«Ақтөбе» – «Ертіс»

Павлодарлықтар өткен турда «Астананы» ірі есеппен (3:0) жеңіп, төрт матчтық жеңіліс сериясын үзді.

Ал «ақ-қызылдардың» маусымдағы жолы бұдан да шиеленісті: бес тур ішінде жанкүйерлер «Каспийді» әрең жеңгенін, «Шахтермен» тең түскенін, сондай-ақ «Қайраттан» ірі есеппен жеңіліп, «Ордабасы» мен «Тараздан» ең төменгі есеппен ұтылғанын көрді.

Бұл ретте «Ақтөбе» барлық сәтсіздіктерге сырт алаңда тап болды – өз үйінде команда ұпай жинай алып жүр. Алайда, алдағы кездесуге сары қағаздардың көптігіне байланысты «кеншілер» қақпасына құтқарушы гол соққан «Ақтөбе» қорғаушысы Роман Шаповалов қатыса алмайды. Бұл қонақтарға көмектесе ме?

«Тобыл» – «Тараз»

Екі команда да тұрақты нәтижелерімен мақтана алмайды: әрқайсысы үш жеңіске жетіп, екі рет жеңіліске ұшырады және еншілерінде алты ұпайдан бар. Нәтижесінде – турнирлік кестенің ортасында көрші орналасқан. Үйде де, қонақта да әлі ешқайсысы тең ойнаған жоқ, бұл алдағы матчтың да біреудің жеңісімен аяқталатынына меңзейді.

Оңтүстіктердің жартылай қорғаушысы Расул Нұрманбай соңғы төрт тур қатарынан кем дегенде бір голдан соғып келеді, ал өткен уикэндте жеңісті дубльмен көзге түсті – Fantasy QJ League ойыншылары оны өз құрамына қосу туралы ойланғаны жөн шығар.

«Тобылға» келетін болсақ, қостанайлықтардың үздік сұрмергені Нәби Таласбек командасының голдарының жартысын соқты – төрт голдың екеуі оның еншісінде. Соңғы екі турда Олег Лотовтың шәкірттері гол соға алмады – бұл жолы көздеген нысанаға дөп тигізе алар ма екен?


Алдағы ойын уикэнді мектептердегі бітіру емтихандарына байланысты үш апталық үзілістің алдындағы соңғы ойын екенін атап өтеміз. Келесі демалыс күндері ҚФФ Академиясы мен «Қайсар» 2-турдың кейінге шегерілген матчын өткізеді, ал Лига толық форматта тек 13 маусымда оралады.