Мақсат Абраевтің рекорды және пенальтиден жасалған покер: Freedom QJ League-тің 7-турынан не білу керек

Кибертурнир чемпионы шынайы өмірде де жарқырауда

«Астана» биылғы маусымда «Қайсарға» қарсы ең ірі жеңісті тіркеді – Сәрсенов Марат жаттықтыратын команданың қақпасына жауапсыз 10 гол соғылды. Қонақтар бірде-бір дәл соққы жасай алмады.

Бұл ойында негізгі қаһарман – Freedom Media Cyber Cup чемпионы Мақсат Абраев. 56-минутта маусымдағы алғашқы голын соққан шабуылшы тоқтап қалмай, бірден покер жасап шықты. Оған қоса, Абраев екі нәтижелі пас берді.
Fantasy QJ League ойынында Абраевты таңдағандарға қатты жолы болды – бұл перформанстың арқасында ол 24 ұпай жинады.

Қазір «Астана» турнир кестесінде екінші орында. Алайда келесі үш орындағы командалар да жақын, сондықтан гол айырмашылығы шешуші фактор болуы мүмкін.

Сатеновтың пенальтилік покері

«Шахтер» мен «Ертіс» арасындағы матчта гол көп болды, бірақ жетеудің бесеуі пенальтиден соғылды. «Шахтер» жартылай қорғаушысы Найман Сатенов 4 рет 11 метрлік соққы орындап, бәрін голға айналдырды – нәтижесінде покер жасап, командасына 4:3 есебімен жеңіс сыйлады.

Тағы бір жарқын ойыншы – Руслан Рахметов дубль жасап, алғашқы турдағы жарқын старты (3+2) мен 4 ойындық үзілістен кейін қайтадан нәтижелілікке оралды.

U-17 турнирінде де «Шахтер» жеңіске жетті: Кирилл Ермаков хет-трик жасады, ал павлодарлықтар тек Ернұр Сайлаудың голымен жауап берді.

«Тоболдың» алғашқы жеңісі

Турнирлік кестенің соңғы екі орнында тұрған «Тобол» мен «Каспий» командалары Костанайда кездесіп, алаң иелері жеңіске жетті. Гол авторлары – Руслан Джетенов пен Нұрмұбарак Жақсылық.

Осылайша турнирде жеңісі де, ұпайы да жоқ жалғыз команда қалды – ол Ақтау ұжымы.